रत्नागिरी:- अहमदाबाद (गुजरात) येथे होत असलेल्या ३६ व्या राष्ट्रीय क्रीडा स्पर्धोसाठी रत्नागिरीच्या योगापटू पूर्वा आणि प्राप्ती किनरे या भगिनींची निवड झाली आहे. शासनाच्या राष्ट्रीय क्रीडा स्पर्धेत प्रथमच योगाचा समावेश झाला असून किनरे भगिनी या स्पर्धत सहभागी होणार्‍या रत्नागिरी जिल्ह्यातील पहिल्या खेळाडू ठरल्या आहेत.
अहमदाबाद ३६ व्या राष्ट्रीय क्रीडा स्पर्धांचा थरार सुरु आहे. या स्पर्धत यंदा प्रथमच योगासन या क्रीडा प्रकार समाविष्ट करण्यात आला आहे. स्पर्धेसाठी रत्नागिरी जिल्हा क्रीडा कार्यालयातील योग प्रशिक्षण केंद्राच्या योगपटू आंतरराष्ट्रीय खेळाडू पूर्वा किनरे आणि प्राप्ती किनरे यांची निवड झाली आहे. जिल्हयातून निवड झालेल्या योगामधील त्या एकमेव खेळाडू आहेत. गेली दहा वर्षे त्या जिल्हा क्रीडा कार्यालयाचे योग प्रशिक्षक रवि भूषण कुमठेकर यांच्याकडे प्रशिक्षण घेत आहेत. पूर्वा आणि किनरे या योगाच्या आंतरराष्ट्रीय खेळाडू आहेत. त्यांनी आजवर विविध राष्ट्रीय आणि राज्यपातळीवरील स्पर्धमध्ये सुवर्णपदके पटकावली आहेत. राष्ट्रीय शालेय स्पर्धत पूर्वाने ६ वेळा तर प्राप्तीने ५ वेळा सुवर्ण आणि रौप्यपदके पटकावली आहेत. पूर्वाहिने फान्समध्ये झालेल्या आंतरराष्ट्रीय स्पर्धात तीन रौप्यपदके मिळवली आहेत. भारत योगसम्राज्ञी, मिस योगिनी हे पूरस्कारही तिने प्राप्त केले आहेत. या दोघींना जिल्हा क्रीडाधिकारी किरण बोरावडेकर, तत्कालीन जिल्हा क्रीडाधिकारी मिलींद दीक्षित, नितीन तारळकर, चंद्रदीप शिंदे, क्रीडाशिक्षक विनोद मयेकर, राजेश आयरे, किरण जोशी, श्रध्दा जोशी यांच्यासह वडील शिवराम किनरे आणि त्यांची आई यांनी शुभेच्छा दिल्या आहेत.
