रत्नागिरीः– सातबारा उताऱ्यानंतर आता डिजिटल स्वाक्षरी असलेले प्रॉपर्टी कार्ड भूमिअभिलेख विभागामार्फत ऑनलाईन पध्दतीने उपलब्ध होणार आहेत. त्यामुळे घरबसल्या प्रॉपर्टी कार्ड पाहता येणार आहे. या सुविधेमुळे नागरिकांच्या वेळेची बचत होणार असून बनावट प्रॉपर्टी कार्डला आळा बसणार आहे.जिल्ह्यात ८८ हजार ५६४ प्रॉपर्टी कार्ड आहेत. यातिल ३३ हजार ९५४ कार्डवर डिजिटल स्वाक्षरी झाली आहे.
भूमि अभिलेख विभागाकडून नागरिकांना विविध प्रकारच्या सेवा ऑनलाइन उपलब्ध करून देण्यात येत आहे. केंद्र सरकारने ईज ऑफ डुइर्ग बिझनेसचे धोरण अवलंबिले आहे. त्या अंतर्गत अभिलेखांचे संगणकीकरण, फेरफार प्रकियेत सुटसुटीतपणा आणि किमान मानवी हस्तक्षेप या तत्त्वांचा स्वीकार करण्यात येत आहे.या पार्श्वभूमीवर डिजिटल स्वाक्षरी असलेले प्रॉपर्टी कार्ड नागरिकांना ऑनलाइन उपलब्ध करून देण्याचा उपक्रम राबविला जात आहे. यामुळे विभागाचे कामकाज गतिमान आणि पारदर्शक होणार आहे.
नागरिकांना भूमापन कार्यालयात जावे लागणार नाही घरबसल्या प्रॉपर्टी कार्ड ऑनलाईन मिळणार आहे. प्रॉपर्टी कार्ड देताना ऑनलाईन पैसे भरण्याची सुविधाहि उपलब्ध करुन देण्यात आली आहे. ऑनलाईन प्रॉपर्टी कार्डची सुविधा उपलब्ध करून दिल्याने बनावट प्रॉपर्टी कार्डला आळा बसणार असून फसवणूक टळणार आहे.
जिल्ह्यात ८८ हजार ५६४ प्रॉपर्टी कार्ड आहेत. यातिल ३३ हजार ९५४ कार्डवर डिजिटल स्वाक्षरी झाली आहे. ३३ हजार ७७४ कार्ड ऑनलाईन अपलोड करण्यात आली आहेत.
डिजिटल स्वाक्षरी असलेले ऑनलाइन प्रॉपर्टी कार्ड उपलब्ध करून देण्यासाठी राज्य सरकारने यापूर्वीच दर निश्चित करून दिले आहेत. त्यानुसार शहरी भागातील मिळकतीचे प्रॉपर्टी कार्ड दिले जाणार आहे. शासनाने दिलेल्या संकेतस्थळावर ऑनलाइन प्रॉपर्टी कार्ड मिळणार आहे. प्रॉपर्टी कार्डसाठी ऑनलाइन पैसे भरण्याची सुविधा देखील उपलब्ध करून देण्यात आली आहे.
