देवरूख:- संगमेश्वर तालुक्यातील देवरूख नजिकच्या एका गावात सख्ख्या मेव्हणीला मातृत्व लादल्याचा धक्कादायक प्रकार समोर आला आहे. पीडित तरूणीने या प्रकरणी देवरूख पोलिसांत तक्रार दाखल केली असून त्यानुसार पोलिसांनी संशयिताविरूद्ध बलात्कारचा गुन्हा दाखल केला आहे. पुढील तपासासाठी पोलिसांकडून संशयिताला अटक करण्यात आली.
संशयित आरोपी याला लहान मुल असल्याने पत्नीच्या मदतीसाठी मेव्हणी घरी वास्तव्याला आली होती. याकाळात पत्नी घराबाहेर गेल्याचा फायदा उठवत संशयिताने पीडितेशी जबरदस्तीने शरिरसंबंध प्रस्थापित केले अशी तक्रार देवरूख पोलीस ठाण्यात दाखल करण्यात आली आहे. दरम्यान जुलै २०२३ रोजी पीडित ही कडवई येथील आपल्या मूळ गावी परतली. यावेळी तिला अस्वस्थ जाणवू लागल्याने नातेवाईकांनी शासकीय रूग्णालयात दाखल केले.
वैद्यकीय अधिकार्यानी तपासणी करण्यासाठी पिडीतेची सोनोग्राफी करण्यास नातेवाईकांना सांगितले. सोनोग्राफीमध्ये पिडीता ही गर्भवती असल्याचे समोर आले. त्यांनी याबाबत पिडीतेला विश्वासात घेवून चौकशी केली असता संशयित आरोपीने आपल्याशी जबरदस्तीने शरिरसंबंध प्रस्थापित केल्याचे उघड केले. पिडीतेकडून देवरूख पोलीस ठाण्यात तक्रार दाखल करण्यात आली. त्यानुसार पोलिसांनी संशयिताविरूद्ध भादंवि कलम ३७६ (२), (एफ) (एन) (१) नुसार गुन्हा दाखल करण्यात आला तसेच संशयिताला पोलिसांकडून गुन्ह्याच्या तपासासाठी अटक करण्यात आली.
