चिपळूण मधील दाम्पत्याविरोधात गुन्हा दाखल
चिपळूण:- ठाण्यात राहणाऱ्या एका वयोवृध्द इसमाला चिपळूण शहरात राहणाऱ्या एका तथाकथित सामाजिक कार्यकर्त्या महिलेने आपल्या पतीच्या मदतीने १२ लाखांना गंडा घातल्याचा प्रकार उघड झाला आहे. याप्रकरणी ठाण्याच्या वर्तकनगर पोलीस ठाण्यात सदर दाम्पत्याविरोधात गुन्हा दाखल करण्यात आला आहे.
ठाण्यातील शिवाईनगर भागात राहणारे पांडुरंग गोपाळ पवार (७०) हे गेल्या १२ वर्षांपासून ह्यूमन फॉर प्रोटेक्शन या संघटनेचे काम करीत होते. गेल्यावर्षी ते अध्यक्षपदावरुन निवृत्त झाले. याचदरम्यान संघटनेचे राज्यभर काम करीत असताना पवार यांचा परिचय चिपळूण शहरातील एकता क्लस्टर या ठिकाणी राहणाऱ्या सौ. शुभांगी व त्यांचे पती किरण जाधव यांच्याशी झाला. त्यानंतर पवार यांनी शुभांगी जाधव यांची ह्युमन राईट्स असोसिएशन फॉर प्रोटेक्शन या संघटनेच्या रत्नागिरी जिल्हा महिला प्रमुखपदी निवड केली. कामानिमित्त जाधव दाम्पत्य व पवार यांच्यात ओळख वाढली. याच ओळखीचा फायदा घेत सौ. शुभांगी व किरण जाधव यांनी पवार यांच्याकडे गुंतवणुकीचा प्रस्ताव सादर केला. या गुंतवणुकीद्वारे पवार यांना योग्य परताव्याचे आमिष दाखविले. यावर विश्वास ठेवून पवार यांनी २९ डिसेंबर २०२१ ते १८ जानेवारी २०२३ या कालावधीत जाधव दाम्पत्यास एकूण १२ लाख रुपये रोख तसेच ऑनलाईन पध्दतीने दिले. तसेच या गुंतवणुकीबाबत कोणाकडेही बोलू नका, जर कोणाला सांगितले तर आपल्या संस्थेची बदनामी होईल, अशी धमकीही दिली. याचदरम्यान पवार यांच्या पत्नी आजारी पडल्या. त्यांच्या औषधोपचारासाठी शुभांगी जाधव यांच्याकडे पवार यांनी पैसे मागितले असता विविध कारणे देत टाळाटाळ केली. वारंवार मागणी केल्यानंतर आतापर्यंत सौ. शुभांगी जाधव यांनी पवार यांना ७५ हजार रुपये परत केले आहे. उर्वरित राकमेबाबत विचारणा केली असता सौ. शुभांगी यांनी या गुंतवणुकीबाबत कुठेही बोललात तर मी चिठ्ठी लिहून आत्महत्या करेन, अशी धमकी देत असल्याचे श्री. पवार यांनी वर्तकनगर पोलीस केलेल्या तक्रारी नमूद केले आहे.
आपले अजून ११ लाख २५ हजार रुपये मिळाले नसल्याने आपली फसवणूक झाल्याचे लक्षात येताच पांडुरंग पवार यांनी याप्रकरणी दिलेल्या तक्रारीवरुन ठाण्याच्या वर्तकनगर पोलीस ठाण्यात सौ. शुभांगी व किरण जाधव यांच्याविरोधात भादंवि कलम ४२०, ३४ अन्वये गुन्हा दाखल करण्यात आला असून पोलीस निरीक्षक सदाशिव विष्णू निकम अधिक तपास करीत आहेत.
