रत्नागिरी:- जिल्हा परिषदेच्या गट क संवर्गाच्या 18 पदांच्या 715 जागांसाठी 70 हजार 608 उमेदवारांनी अर्ज केले आहेत. यात ग्रामसेवक पदासाठी सर्वाधिक अर्ज म्हणजे तब्बल 41 हजार अर्ज दाखल झाले आहेत. 3 ऑक्टोबर पासून परीक्षा सुरू होत आहे. फक्त ग्रामसेवक पदासाठी अजूनही परीक्षा निश्चित झालेली नाही.
जिल्हा परिषदेच्या नोकर भरतीसाठी मुदतीअखेर 70 हजार 608 उमेदवारांनी अर्ज दाखल केले आहेत. हे सर्व अर्ज ऑनलाईन पद्धतीने मागवण्यात आले होते. एकूण 18 संवर्गासाठी ही भरती प्रक्रिया होत असून एकूण 715 जागा आहेत. सर्वाधिक अर्ज हे ग्रामसेवकसाठी आले आहेत. 185 जागा असून यासाठी 41 हजार 145 उमेदवारांनी अर्ज दाखल केले आहेत. आरोग्य सेवक दोन पदांसाठी 64 हर्ज आले आहेत. आरोग्य परिचारीकांच्या भरतीसाठी 227 जागांसाठी 932 अर्ज आले आहेत. तर आरोग्य सेवक 22 जागांसाठी 4 हजार 815 अर्ज प्राप्त झाले आहेत. आरोग्य सेवक पुरुष हंगामी फवारणी क्षेत्र कर्मचारी यांच्या 52 जागांसाठी 1 हजार 50 अर्ज आले आहेत.
औषध निर्माण अधिकार्‍यांच्या भरतीसाठी 37 जागांसाठी 4 हजार 199 अर्ज प्राप्त झाले आहेत. तर विस्तार अधिकारी सांख्खिकी 3 जागांसाठी 564 अर्ज, विस्तार अधिकारी कृषी 4 जागांसाठी 811 अर्ज आले आहेत. वरिष्ठ सहाय्यक लिपिक 1 जागेसाठी 299 अर्ज आले आहेत. पशुधन पर्यवेक्षक 42 जागांसाठी 1 हजार 286 अर्ज प्राप्त झाले आहेत. कनिष्ठ आरेखक 2 जागांसाठी 61 अर्ज आले आहेत. वरिष्ठ सहाय्यक लिपिक 68 जागांसाठी 11 हजरी 41 अर्ज तर पर्यवेक्षिका 9 जागांसाठी 1 हजार 548 अर्ज प्राप्त झाले आहेत. कनिष्ठ अभियंता स्थापत्य बांधकाम ग्रामीण पाणी पुरवठा 31 जागांसाठी 1 हजार 557 अर्जआले आहेत. स्थापत्य अभियांत्रिकी सहाय्यक 22 जागांसाठी 744 अर्ज आले आहेत. लघुलेखक उच्चश्रेणी 1 जागेसाठी 117 अर्ज दाखल झाले आहेत.
ग्रामसेवक पद सोडून इतर पदांसाठी 3 ते 11 ऑक्टोबर 2023 या दरम्यान परीक्षा होणार आहे. ग्रामसेवक पदासाठी अर्ज जास्त असल्यामुळे या परीक्षेची तारीख अजूनही निश्चित करण्यात आलेली नाही. 3 ऑक्टोबरला कनिष्ठ लेखाधिकारी, कनिष्ठ अभियंता, 5 ऑक्टोबर रोजी पशुधन पर्यवेक्षक, 7 ऑक्टोबरला वरिष्ठ सहाय्यक, 8 रोजी विस्तार अधिकारी (सांखिकी), 10 ला विस्तार अधिकारी कृषी, आरोग्य पर्यवेक्षक, 11 ला लघु लेखक, कनिष्ठ सहाय्यक लेखा अशी परीक्षा असणार आहे.
