साखरपा:-रत्नागिरी-कोल्हापूर महामार्गावरील आंबा घाटातील खोल दरीत अज्ञात पुरुषाचा मृतदेह आढळून आला. अज्ञात पुरूष मृतदेहाच्या मानेभोवती दोरी व दोन्ही हात बांधलेल्या स्थितीत असल्याने घातपाताची शक्यता व्यक्त करण्यात येत आहे. यामुळे आंबा घाट पुन्हा चर्चेत आला आहे.
पश्चिम घाटाला जोडणारा आंबा घाट हा गुन्हेगारांना सुरक्षित असा वाटत असल्याने या ठिकाणी खून करून मृतदेह दरीत फेकून देण्याचे प्रकार वाढीस लागले आहेत. 7 मार्च 2021 मध्येही एकाचा तीक्ष्ण हत्याराने खून करून मृतदेह आंबा घाटाच्या दरीत टाकला होता. मृतदेह कुजल्या नंतर त्या खुनाला वाचा फुटली.
याबाबत देवरूख पोलीसांकडून मिळालेल्या माहितीनुसार, आंबा घाटातून प्रवास करणाऱ्या प्रवाशाला घाटातील गायमुखापासून सुमारे ५०० मीटर अंतरावर १५० खोल दरीत अज्ञात पुरूषाचा मृतदेह असल्याची खबर देवरूख पोलीसांना मिळाल्या नंतर पोलीस निरीक्षक बाळकृष्ण जाधव आपल्या सहकाऱ्यांसमवेत घटनास्थळी पोहोचले. यावेळी मृतदेह दरीतून बाहेर काढण्यासाठी राजू काकडे हेल्प अँकॅडमीच्या टिमला पाचारण करण्यात आले.
यानुसार अँकॅडमीचे अण्णा बेर्डे, दिलीप गुरव, चंद्रकांत भोसले, प्रविण परकर यांनी घटनास्थळी जावून मृतदेह दुपारनंतर दरीतून बाहेर काढला. या अज्ञात पुरूष मृतदेहाचे वय अंदाजे २५ ते ३० असून त्याचा घातपात करण्यात आल्याचा संशय व्यक्त करण्यात येत आहे. अधिक तपास पोलीस करीत आहेत.
आंबा घाटाला 2020 खुनाची पार्श्वभूमी
येथील चक्री वळणानजीक संरक्षण भिंतीजवळ ७ मार्च २०२० रोजी कुजलेल्या अवस्थेत एक मृतदेह मिळून आला होता. मृतदेहावर तीक्ष्ण हत्यारांच्या खुणा होत्या. यावरून तो खून होता, हे स्पष्ट झाले होते. आरोपींनी गोणीत भरून मृतदेह दरीत फेकून दिला होता. पुरावा नसल्याने मृतदेहाची ओळख पटली नव्हती. हा मृतदेह ३० ते ३५ वर्षीय तरूणाचा असल्याचे वाटत होते. मयताचे अंगावर असणारा शर्ट हा लांजा देवराई येथील बेपत्ता प्रकाश भोवड या इसमाचा असल्याचा अंदाज पोलिसांनी वर्तवला. यानंतर प्रकाश भोवड याचे नातेवाईकांना बोलावल्यानंतर मृतदेहाचीओळख पटली. ४ मार्च २०२० रोजी मयत प्रकाश भोवड व त्याचे दोन मित्र रूपेश दयानंद कोत्रे (रा. लांजा शेवरवाडी) व सतिश चंद्रकांत पाल्ये (रा. कोंड्ये पाल्येवाडी) यांनी एकत्रित जेवणाची पार्टी केली होती ही माहिती पुढे आली आणि पोलिसांनी दोघांचा माग घेऊन रूपेश कोत्रे व सतिश पाल्ये या दोघांच्या मुसक्या आवळल्या.
