रत्नागिरी:- राज्यात विधानसभेसाठीची निवडणूक बुधवारी होत असून, रत्नागिरी जिल्ह्यात पाच विधानसभा मतदार संघात 1747 मतदान केंद्रांवर 13 लाख 39 हजार 697 मतदार मतदानाचा हक्क बजावणार आहेत. जिल्ह्यातून 45 उमेदवार निवडणूक रिंगणात आहेत. जिल्ह्यात नवतरुणांसह वृध्द मतदारांची संख्याही मोठी आहे. प्रशासनाने जास्तीत मतदान व्हावे यासाठी अगदी ग्रामीण भागापर्यंत मतदान करण्याचे आवाहन केले आहे.

जिल्ह्यात पाच विधानसभा मतदार संघासाठी बुधवारी सकाळी 7 वाजल्यापासून सायंकाळी 6 वाजेपयर्र्त मतदानाचा हक्क मतदारांना बजावता येणार आहे. जिल्ह्यात 1747 विधानसभा मतदान केंद्र असून यात दापोलीत 392, गुहागर 322, चिपळूण 336, रत्नागिरी 352, राजापूर 345 मतदान केंद्र आहेत. यातील शहरीभागात 184 तर ग्रामीण भागात 1563 मतदान केंद्रावर मतदान होणार आहे.

दापोलीमध्ये 2 लाख 91 हजार 297 मतदार असून यात 1 लाख 39 हजार 895 पुरुष तर 1 लाख 51 हजार 402 महिला मतदार आहेत. गुहागर विधानसभा मतदार संघात 2 लाख 42 हजार 704 एकूण मतदार असून त्यात 1 लाख 15 हजार 511 पुरुष तर 1 लाख 27 हजार 193 महिला मतदार आहेत. चिपळूण मतदार संघात 1 लाख 34 हजार 883 पुरुष तर 1 लाख 41 हजार 183 महिला असे 2 लाख 76 हजार 66 एकूण मतदार आहेत. रत्नागिरी मतदार संघात 1 लाख 42 हजार 48 पुरुष तर 1 लाख 49 हजार 162 महिला अशा 2 लाख 91 हजार 221 एकुण मतदार आहेत. राजापूर मतदार संघात 2 लाख 38 हजार 409 एकूण मतदार असून यात 1 लाख 13 हजार 839 पुरुष तर 1 लाख 24 हजार 570 महिला मतदार आहेत. तर रत्नागिरी विधानसभा मतदार संघात 11 तृतीयपंथी मतदार आहेत.

जिल्ह्यात 24 हजार 589 नवमतदार असून ते प्रथमच मतदानाचा हक्क बजावणार आहेत. त्यामुळे नवतरुणांमध्ये बुधवारी होणार्‍या मतदानाबाबत उत्साह दिसत आहे. जिल्ह्यात शंभर वयावरील 394 मतदारांची नोंद प्रशासनाने केली आहे. यातही 110 वर्षापेक्षा अधिक वयाची एक महिला मतदाराची नोंद करण्यात आलेली आहे. जिल्ह्यात 7 हजार 201 दिव्यांग उमेदवारांची नोंद आहे. सर्वाधिक दिव्यांग उमेदवारांची नोंद चिपळूणमध्ये आहे.

जिल्ह्यात 13 लाख 39 हजार 697 एकूण मतदार असून यात पुरुष मतदार 6 लाख 46 हजार 176 आहेत. तर 6 लाख 93 हजार 510 इतक्या महिला मतदार आहेत. पाच विधानसभा मतदार संघात मिळून 47 हजारहून अधिक महिला मतदार आहेत. प्रत्येक मतदार संघात आठ ते अकरा हजार इतक्या महिला अधिक आहेत. त्यामुळे पाचही ठिकाणी महिलाच उमेदवारांचे भविष्य ठरवणार आहेत.

रत्नागिरी:- रत्नागिरी विधानसभा मतदारसंघाचे उबाठाचे उमेदवार बाळ माने हे मागील १० वर्षापासून मे. मिऱ्या पोर्ट प्रा.लि.च्या माध्यमातून पोर्ट उभारणीसाठी प्रयत्नशील होते. मिऱ्या येथे इंटरनॅशनल पोर्ट, लॉजिस्टीक पार्क झाल्यास त्यांच्या स्वप्नांवर पाणी फिरणार होते. त्यामुळेच ग्रामस्थांमध्ये गैरसमज पसरवल्याचा आरोप मिऱ्या येथील ग्रामस्थ दिनेश सावंत व त्यांच्या सहकाऱ्यांनी पत्रकार परिषदेत केला.

आम्ही याची तक्रार निवडणूक आयोगाकडे करु शकलो असतो, परंतु मिऱ्या ग्रामस्थांमध्ये चुकीची माहिती व गैरसमज पसरवणाऱ्यांना मैदानात घेऊन पराभूत करणार असल्याचे सावंत यांनी सांगितले.

रत्नागिरीत सोमवारी आयोजित पत्रकार परिषदेत बोलत होते. यावेळी सडामिऱ्या सरपंच अर्पिता सावंत, ग्रा.पं.सदस्य शिल्पा पवार, जाकिमिऱ्या सरपंच कीर, निशांत सावंत, भैय्या भाटकर यांच्यासह अन्य ग्रामस्थ उपस्थित होते. यावेळी खंडाळा येथील नंदकुमार बेंद्रे, जयगड येथील शराफत गडबडे, जयगड मच्छीमार सोसायटीचे व्हाईस चेअरमन सलीम मिरकर यांच्यासह ग्रामस्थ उपस्थित होते.

उद्योगमंत्री उदय सामंत यांनी मिऱ्या येथे एमआयडीसीच्या माध्यमातून लॉजिस्टीक पार्क आणि इंटरनॅशनल पोर्ट उभारणार होते. परंतु ग्रामस्थांच्या मोठ्या प्रमाणात जागा जाणार, देवस्थानच्या जागा जाणार, अशा सांगून ग्रामस्थांमध्ये गैरसमज पसरवल्याचा आरोप माजी सरपंच दिनेश सावंत यांनी केला. माजी आमदार बाळ माने यांच्या जाकीमिऱ्या येथील निवासस्थान असलेल्या कमलाश्रमच्या नावाने मिऱ्या पोर्ट प्रा. लि. नावाने कंपनी रजिस्टर्ड करण्यात आली आहे. यासाठी काही एकर जागा मेरीटाईम बोर्डकडून लीजवर घेण्यात आली होती. त्याचे पैसेही भरण्यात येत होते. २०१७ मधील लीजचे पैसे भरले गेले नव्हते. ते. २९ ऑक्टोबरला जमा करण्यात आले. आम्ही याची तक्रार निवडणूक आयोगाकडे करु शकलो असतो, परंतु मिऱ्या ग्रामस्थांमध्ये चुकीची माहिती व गैरसमज पसरवणाऱ्यांना मैदानात घेऊन पराभूत करणार असल्याचे दिनेश सावंत यांनी सांगितले. सावंत यांच्याप्रमाणेच वाटद जि.प. गटातील काही ट्रक मालकही उपस्थित होते.

रत्नागिरी:- हवामानातील बदल आणि अवकाळी पाऊस यामुळे सतत नुकसानीला सामोरे जाणाऱ्या आंबा बागायतदारांसाठी राज्य सरकारने कोणतीही ठोस मदत न केल्यामुळे आंबा बागायतदारांनी महाविकास आघाडीचे उमेदवार बाळ माने यांना सोमवारी जाहीर पाठींबा दिला. पावस परिसर हापूस आंबा उत्पादक संघाचे अध्यक्ष प्रकाश साळवी यांनी सोमवारी पत्रकार परिषदेत ही घोषणा केली.

पावस परिसर हापूस आंबा उत्पादक संघाचे अध्यक्ष आणि कोकण हापूस आंबा उत्पादक आणि उत्पादक विक्रेते सहकारी संस्थेचे उपाध्यक्ष प्रकाश साळवी यावेळी म्हणाले की, गेले काही वर्ष आंबा बागायतदार आर्थिक अडचणीत सापडला आहे. २०१५ पासून थकीत कर्ज असलेल्या आणि नियमित कर्ज असलेल्या रत्नागिरी जिल्ह्यातील शेतकऱ्यांची एकूण संख्या १ लाख ०९ हजार ७४७ आहे. थकीत कर्जदारांची संख्या ११ हजार ३२६ असून २२३ कोटी ८६ लाख रुपये कर्ज थकीत आहे. या सर्व शेतकऱ्यांना कर्जमाफी मिळावी अशी आमची मागणी होती. मात्र या सरकारने आंबा बागायतदारांच्या कर्जमाफीकडे दुर्लक्ष केले. २०२२-२३ या वर्षात आंबा पीक १० ते १२ टक्के आले होते. मात्र शासनाकडून आम्हाला कोणतीही मदत मिळाली नसल्याची खंत साळवी यांनी व्यक्त केली. आंबा बागायतदारांना पीक विम्याचेही पैसे मिळाले नाहीत. तसेच माकडांकडून होणाऱ्या त्रासाकडेही दुर्लक्ष करण्यात आल्याची खंत त्यांनी व्यक्त केली. येथील पालकमंत्री आणि सरकारकडे आम्ही वारंवार मागणी करुनही आंबा बागायतदारांचे प्रश्न सुटले नाहीत. महाविकास आघाडीचे उमेदवार बाळ माने यांच्याशी आम्ही चर्चा केल्यानंतर त्यांनी आंबा बागायतदारांचे प्रश्न सभागृहात मांडण्याचे आम्हाला आश्वासन दिले आहे. त्यामुळे आम्ही आंबा बागायतदार संघटनांनी महाविकास आघाडीचे उमेदवार बाळ माने यांना पाठींबा जाहीर केला आहे असे सांगितले. आंबा बागायतदार सुदर्शन तोडणकर यांनीही आपली स्पष्ट भूमिका मांडली. सध्याच्या सरकारने बागायतदारांकडे दुर्लक्ष केले आहे. आंबा बागायतदारांचे प्रश्न महाविकास आघाडीच सोडवू शकते. असा आम्हाला विश्वास आहे. म्हणूनच आम्ही महाविकास आघाडीला पाठींबा दिला असल्याचे त्यांनी सांगितले. यावेळी संतोष पोकडे, दीपक राऊत, रवींद्र मांडवकर, अमृत पोकडे, अविनाश गुरव, सचिन भातडे, प्रमोद तिवरेकर, भास्कर मुकादम, शोएब काजी आणि इतर बागायतदार उपस्थित होते.