संगमेश्वर:- संगमेश्वर तालुक्यातील प्रसिद्ध श्री क्षेत्र मार्लेश्वरच्या पर्यटनाच्या विकासासाठी प्रादेशिक पर्यटन अंतर्गत १० कोटी रुपयांचा निधी मंजूर झाला आहे. या प्रकल्पांसाठीची निविदाप्रक्रिया अंतिम टप्पात असून, लवकरच प्रकल्पाची कामे सुरू होतील तसेच राज्यशासनाच्या हॅम योजनेंतर्गत मार्लेश्वर रस्ता आणि आजुबाजूच्या नऊ गावांमधील रस्ते रूंदीकरणासाठी १८५ कोटी मंजूर झालेले आहेत. यासाठी आमदार शेखर निकम यांनी प्रयत्न केले होते.
देवरूखमधील पर्यटन प्रकल्पांमध्ये मार्लेश्वर मंदिर ते दत्तमंदिरदरम्यानच्या नदीवर कमानी पुलाचे (आर्च ब्रीज) बांधकाम, श्री क्षेत्र मार्लेश्वर मंदिर परिसरात गॅलरी उभारणे, भक्तांच्या सोयीसाठी भक्तनिवास व सभामंडप, प्रमुख पालखीमार्गाची सुधारणा करणे, स्वच्छतागृह आणि चेंजिगरूम, वाहनतळ, विद्युतीकरण आणि मैदान विकास, सर्व भागांत विद्युतपुरवठा सुविधा, धोकादायक ठिकाणी संरक्षक भिंती उभारण्यात येणार आहेत तसेच लँडस्केपिंग आणि आरसीसी डिझाईन, परिसराची आकर्षक सजावट, पाणीपुरवठा व्यवस्था आणि पाथवेचे बांधकाम केले जाणार आहे. राज्यशासनाच्या हॅम योजनेंतर्गत तळेकांटे, देवरूख, मुरादपूर, मारळ, बामणोली, खडीकोळवण, ओझरे, कळकदरा आणि मारळ मार्लेश्वर रस्तारूंदीकरणासाठी १८५ कोटी रुपये मंजूर झाले आहेत. त्याची निविदाप्रक्रिया पूर्ण झाली आहे. त्याचबरोबर टिकलेश्वर देवस्थान विकासासाठी १ कोटी मंजूर असून, त्यात टिकलेश्वर देवस्थान मंदिराकडे जाणारा रस्ता तयार करणे, स्वच्छतागृह आणि पेव्हर पाखाडी बांधणे, रेलिंगची स्थापना, परिसरातील सुरक्षितता सुनिश्चित करणे ही कामे केली जाणार आहेत. तसेच जिल्हा नियोजनमधून विद्युतीकरणासाठी ४५ लाख रुपये आले आहेत. येत्या काळात टिकलेश्वर देवस्थानसाठी आणखी ३ कोटी रुपयांचा निधी मिळणार आहे. संगमेश्वर तालुक्यातील महिपत गड प्रकल्पासाठी ३ कोटी ५० लाख मंजूर आहेत. त्यामध्ये गडाकडे जाणारा रस्ता, संरक्षक भिंती आणि गडाच्या मंदिरासाठी मेघडंबरी उभारणे या प्रमुख कामांसह गडाचे सुशोभीकरण केले जाणार आहे. पर्यटन क्षेत्रातील एकात्मिक विकासाच्या माध्यमातून ही स्थळे अधिक आकर्षक बनवणे आणि पर्यटकांसाठी उत्कृष्ट सुविधा पुरवणे, हे या योजनेचे मुख्य ध्येय आहे. या साऱ्या प्रकल्पांच्या अंमलबजावणीसाठी महाराष्ट्र शासन आणि प्रादेशिक पर्यटन विभागाने आवश्यक ते सर्व पाऊल उचलले असून, लवकरच या कामांचा प्रारंभ केला जाणार आहे.
कसब्यातील स्मारकासाठी निधी
कसबा येथील छत्रपती संभाजी महाराज यांच्या स्मारकासाठी ५ कोटी रुपयांचा निधी मंजूर असून, पुतळ्याच्या कक्षासाठी मेघडंबरी बांधणे, मुख्य प्रवेशद्वारासाठी कमान बांधणे, पुतळ्याजवळ कमान बांधणे, पीसीसी काँक्रिट वाहनतळाची बांधणी, स्मारकाच्या शिल्प सौंदर्य वाढवणे, परिसर सुशोभीकरण व गार्डनिंग, पालखी मार्गावर ब्लॉक बसवणे, स्मारकाची शोभा आणि ऐतिहासिक महत्त्व लक्षात घेता या प्रकल्पामध्ये सर्वांच्या सहकार्याने एक भव्य स्मारक उभारण्याचे उद्दिष्ट आहे. येथील जागेचा प्रलंबित प्रश्न लवकर महायुतीच्या व सर्वांच्या साथीने सोडवून एक भव्यदिव्य स्मारक उभारण्यास प्रयत्न करण्यात येणार आहे.
