लांजा:- तालुक्यातील आंजणारी आणि वाडगाव येथील मोबाईल टॉवरच्या १ लाख १४ हजार रुपयांच्या ३८ बॅटऱ्या अज्ञात चोरट्याने लंपास केल्या आहेत. याप्रकरणी लांजा पोलीस ठाण्यात गुन्हा दाखल करण्यात आला आहे. याबाबतची फिर्याद रितेश शशिकांत रांगोळे (वय ४३ राहणार एकता रेसिडेन्सी, पाग चिपळूण) यांनी लांजा पोलीस ठाण्यात केली आहे. त्यांनी दिलेल्या फिर्यादीमध्ये म्हटले आहे की,
दिनांक २२ जून २०२४ रोजी रात्री ८ ते दिनांक २३ जून रोजी ८ या मुदतीत तालुक्यातील वाडगाव धनगरवाडी आणि आंजणारी येथील मोबाईल टॉवर मधून अज्ञात चोरट्याने बॅटऱ्यांचे रॅक तोडून बॅटऱ्या लंपास केल्या आहेत. यामध्ये वाडगाव धनगरवाडी येथील ४८ हजार रुपये किमतीच्या एचबीएल कंपनीच्या १६ बॅटऱ्या तर आंजणारी येथील टॉवर मधून ६६ हजार रुपये किमतीच्या एक्साइड कंपनीच्या २२ बॅटऱ्या लंपास केल्या असून या एकूण ३८ बॅटर्यांची किंमत १ लाख १४ हजार रुपये इतकी आहे.
याप्रकरणी लांजा पोलीस ठाण्यात अज्ञात चोरट्या विरोधात भादवि कलम ४६१, ३८० प्रमाणे गुन्हा दाखल करण्यात आला आहे. याबाबत अधिक तपास सहाय्यक पोलीस उपनिरीक्षक भालचंद्र रेवणे हे करत आहेत.
