संगमेश्वर:- बाजारपेठेतील दुकानांना भीषण आग लागून दोन दुकाने जळून खाक झाल्याची दुर्दैवी घटना शनिवार 15 जून रोजी पहाटेच्या सुमारास घडली. या आगीत दुकानांचे लाखोंचे नुकसान झाल्याचे बोलले जात आहे.
सविस्तर वृत्त असे की, संगमेश्वर येथील बाजारपेठेत असलेल्या प्रशांत बेंडके यांच्या किराणा मालाच्या दुकानाला पहाटेच्या सुमारास आग लागली. याच दुकानाच्या बाजूला असलेल्या शक्ती ट्रेडर्स दुकानालही आगीने वेढले. बघता बघता दोन्ही दुकाने आगीच्या भक्ष्यस्थानी गेली. ज्वाळांनी परिसरात धुराचे साम्राज्य पसरले होते. दुकानांना आग लागल्याचे कळताच व्यापाऱ्यांनी तिकडे धाव घेतली. आग आटोक्यात आणण्यासाठी प्रयत्न करण्यात आले. मात्र हे प्रयत्न अपुरे ठरले. पहाटेच्या सुमारास लागलेली आग जवळपास दोन तासांहून अधिक काळ आटोक्यात आणण्याचा प्रयत्न सुरू होता. बघता बघता ही आग तेथे असलेल्या दवाखन्यापर्यात पोहोचली. दवाखान्यालाही या आगीचा फटका बसला. संगमेश्वर मध्ये अग्निशमन बंब नसल्याने शेवटी देवरूख नगर पंचायतीचा बंब मागवण्यात आला. आग आटोक्यात आणण्याचे प्रयत्न सुरू आहेत. मात्र तोपर्यंत दोन्ही दुकाने आगीच्या भक्ष्यस्थानी गेली होती. किराणा मालाचे लाखोंचे नुकसान झाले आहे. तसेच ट्रेडर्सचेही मोठ्या प्रमाणात नुकसान झाले आहे. ही आग नेमकी कशामुळे लागली याचे कारण अद्याप समजू शकलेले नाही. शॉर्टसर्किटने आग लागल्याचा अंदाज व्यक्त करण्यात येत आहे.
