रत्नागिरी:- जागा विकण्याच्या बहाण्याने ५७ हजार घेऊन जागेचा कोणताही व्यवहार न करता महिलेची फसवणूक केली. याप्रकरणी एका विरोधात शहर पोलिस ठाण्यात गुन्हा दाखल करण्यात आला असून, ही घटना मंगळवार, दि. १२ मार्च रोजी दुपारी १२ वा. आठवडा बाजार येथील शंखेश्वर आर्केड येथे घडली आहे.
सुमित खेडेकर (रा. सोनवडे संगमेश्वर, रत्नागिरी) असे गुन्हा दाखल करण्यात आलेल्या संशयिताचे नाव आहे. त्याच्याविरोधात मुग्धा सामंत (रा. शंखेश्वर आर्केड आठवडा बाजार, रत्नागिरी) यांनी बुधवार १३ मार्च रोजी शहर पोलिस ठाण्यात तक्रार दिली.
त्यानुसार, संशयित सुमित खेडेकरने आपल्या भावाच्या उपचारासाठी गणपतीपुळे येथील चार गुंठे जागा फिर्यादी मुग्धा सामंत यांना विकण्याच्या बहाण्याने त्यांच्याकडून ५६ हजार ७७० रुपये गुगल पेद्वारे घेतले; परंतु त्यानंतर जागेचा कोणताही व्यवहार न करता घेतलेले पैसेही परत न देता फिर्यादीची फसवणूक केली. आपली फसवणूक झाल्याचे लक्षात येताच फिर्यादीने शहर पोलिस ठाण्यात धाव घेत तक्रार दिली. त्याच्या विरोधात भादंवि कायदा कलम ४२० अन्वये गुन्हा दाखल करण्यात आला आहे. याप्रकरणी अधिक तपास शहर पोलिस करत आहेत.
