रत्नागिरी:- शहरात वाहतुकीला शिस्त लागावी, वाहतूक कोंडी होऊ नये यासाठी काही वर्षांपूर्वी सिग्नल यंत्रणा कार्यान्वित होती. मात्र ही यंत्रणा विविध कारणांमुळे कित्येक वर्षे बंद आहे. नुकत्याच या सिग्नल यंत्रणेसाठी जिल्हा नियोजनमधून सुमारे 50 लाखांचा निधी मंजूर झाला आहे. त्यातून आता जुन्या सिग्नल यंत्रणेच्या जागी नवीन आधुनिक एलईडी सिग्नल यंत्रणा कार्यन्वित होणार असून ती यंत्रणा बसवण्याच्या कामाला पारंभ झाला आहे.
रत्नागिरी शहराच्या वाढत्या शहरीकरणाबरोबर शहरात वाहनांची मोठी वर्दळ वाढत आहे. त्यामुळे शहरातील प्रमुख ठिकाणी वाहतुकीच्या वर्दळीचे नियमन करण्यासाठी सिग्नल यंत्रणा पुन्हा कार्यान्वित करण्याची मागणी होत होती. यालाच अनुसरून रत्नागिरी परिषदेच्या 25 फेब्रुवारी 2022 ला जिल्हा नियोजन समितीकडे सिग्नल यंत्रणा कार्यान्वित व नूतनीकरण करण्यासाठी प्रस्ताव पाठवण्यात आला होता. याला 25 फेब्रुवारी 2023 ला 1 वर्ष झाले. पालकमंत्री उदय सामंत आणि पोलिस अधीक्षक धनंजय कुलकर्णी यांच्या संयुक्त प्रयत्नामुळे या कामासाठी जिल्हा नियोजन समितीकडून निधी मंजूर झाला. याची निविदा प्रक्रियाही सुरु झाली.
रत्नागिरी शहरातील सिग्नल यंत्रणा बंद झाली होती. कोरोना काळात वाहतूक पोलिसांकडून सिग्नल बंद ठेवण्यात आले होते. या दरम्यानच रत्नागिरी शहराच्या नवीन नळपाणी योजनेच्या कामासाठी रस्ते खोदाई करावी लागली. ही कामे करताना काही सिग्नलच्या विद्युत केबल तुटल्या गेल्या. मारुती मंदीर येथील शिवसृष्टीच्या कामासाठी याठिकाणचे सिग्नलचे खांब काढावे लागले होते. रत्नागिरी शहरात वाहनांची मोठ्या प्रमाणात रेलचेल वाढली असल्याने वाहतूक नियमनासाठी सिग्नल यंत्रणा आवश्यक झाली होती.
पोलिस अधीक्षक धनंजय कुलकर्णी यांच्या मार्गदर्शनानुसार वाहतूक पोलिसांनी रत्नागिरी नगरपरिषदेकडे सिग्नल यंत्रणा सुरु करण्याबाबत पत्र व्यवहार सुरु केला. हा प्रस्ताव जिल्हा नियोजन समितीकडे गेल्यानंतर सुमारे 50 लाख रुपयांची निधी मिळण्यासाठी पोलिस अधीक्षकांनी पालकमंत्री उदय सामंत यांच्याकडे पाठपुरावा केला. आता हा निधी मंजूर झाला आहे. जिल्हा नियोजन समितीकडून 20 मार्चला सिग्नल यंत्रणेसाठी जुन्या सिग्नल यंत्रणेच्या जागी नवीन आधुनिक एलईडी सिग्नल यंत्रणा बसवण्यासाठी मंजूरी देण्यात येउन निधीही वितरीत झाला.
शहरातील जयस्तंभ, जेलनाका, मारूती मंदिर सर्पल, रामनाका, गोखलेनाका या भागात ही सिग्नल व्यवस्था उभारण्यात येणार आहे. आता शहरात या चार ठिकाणी सिग्नल यंत्रणा कार्यान्वित करण्याबाबतच्या कामाला वेग घेतला आहे.
