सर्व मशिनरी वर काढून ठेवली; स्थानिकांशी वाद
रत्नागिरी:- अनेक वर्षांपासून मिऱ्यावासीयांची मागणी असलेल्या मिऱ्या धुपप्रतिबंधक बंधाऱ्याचे काम मोठ्या प्रयत्नांनी सुरू झाले असले तरी त्याला खो मिळाला आहे. काही स्थानिकांनी अज्ञात कारणावरून ठेकेदारांपैकी एकाला मारहाण केल्याचा आरोप ठेकेदाराने केला असून त्यामुळे ठेकेदाराने बंधाऱ्याचे काम काल दुपारपासून बंद ठेवल्याचे सांगितले. सर्व मशिनरी वर काढून ठेवल्या आहेत. उशिरापर्यत शहर पोलिस ठाण्यात तक्रार दाखल करण्याची प्रक्रिया सुरू होती.
काल शनिवारी दुपारी ठेकेदारांपैकी काहींशी स्थानिकांचा वाद झाला. या वादातून एक व्यक्तीने एका ठेकेदाराला मारहाण केली. वारंवार होणाऱ्या या त्रासामुळे अखेर ठेकेदाराने आज दुपारी धुपप्रतिबंधक बंधाऱ्याचे काम थांबविले आहे. बंधाऱ्यावर असलेल्या सर्व मशिनरी किनाऱ्यावर आणल्या आहेत. याबाबत काही स्थानिकांशी चर्चा केली असता ते म्हणाले, कोणत्यातरी विषयावरून ठेकेदाराला मारहाण झाल्यामुळे त्याने काम बंद केले आहे. सकाळी काम सुरू होते. दुपारनंतर काम बंद केले आहे.
गेली चाळीस वर्षे भिजत पडलेल्या मिऱ्या धुप्रतिबंधक बंधाऱ्याचा प्रश्न मार्गी लागला. उद्योग मंत्री उदय सामंत यांच्या पुढाकाराने मिऱ्याच्या साडे तीन किमीच्या बंधाऱ्याला १६३ कोटी रुपये मंजूर झाले. दरवर्षी पावसाळ्यात मिऱ्या धूपप्रतिबंधक बंधाऱ्याच्या प्रश्न ऐरणीवर येतो. उधाणाच्या भरतीमुळे वारंवार या बंधाऱ्याची प्रचंड धुप होते. अजस्र लाटा बंधाऱ्या गिलंकृत करून माणवी वस्तीमध्ये समुद्राचे पाणी शिरले आहे. यामुळे नागरिक भयभित होऊन पावसाळ्यात त्यांना रात्र जागून काढावी लागते. आतापर्यंत बंधाऱ्याच्या डागडुजीसाठी कोट्यवधी रुपये खर्च झाले आहेत. सुमारे साडे तीन किमीच्या या बंधाऱ्याचे कायमस्वरुपी पक्क्या बंधाऱ्यात रुपांतर व्हावे, या मागणीसाठी येथील ग्रामस्थांनी आंदोलन केले. त्याची दखल घेऊन शासनाने बंधारा मंजूर केला. तत्कालीन उपमुख्यमंत्री आणि अर्थमंत्री अजित पवार यांच्या हस्ते या बंधाऱ्याच्या कामाचा शुभारंभ करण्यात आला. या कामाला दोन वर्षांची मुदत दिली आहे. त्यापैकी काही महिने काम बंद असल्याने ठेकेदाराला दंडही झाला. आता हे काम युद्धपातळीवर सुरू आहे. सुमारे १५०० मीटरचे काम प्रगतिपथावर असल्याचे पत्तन विभागाने सांगितेल. त्यानंतर मुळ आराखड्याप्रमाणे हे काम नाही, निकृष्ट दर्जाचे काम सुरू असल्याचे निवेदन एका शिष्टमंडळाने दिले.
आता काम वेगात सुरू आहे. काही स्थानिक मंडळी या कामावर लक्ष ठेऊन आहेत.
आम्ही पोलिस ठाण्यात तक्रार देण्यासाठी आलो आहे. साहेबांच्या केबिनला आहे. तक्रार दाखल करणार असून धुप प्रतिबंधक बंधाऱ्याचे काम बंद ठेवणार आहे.
–समीर पवार, ठेकेदार मिऱ्या धुपप्रतिबंधक बंधारा
