चिपळूण:- चिपळूण रेल्वे स्थानकावर रेल्वेत चढत असताना प्रवासी महिलेच्या खांद्यावरील पर्समधून अज्ञात चोरट्याने शिताफीने तब्बल १ लाख ४७ हजार ५३५ रुपये किमतीचे सोन्याचे दागिने आणि रोख रक्कम असा ऐवज लंपास केल्याची घटना शुक्रवारी संध्याकाळी घडली.
पोलिसांनी दिलेल्या माहितीनुसार 9 सप्टेंबर रोजी संध्याकाळी ६ वाजता सुहासिनी सदानंद चव्हाण (51, रा. पालपेणे, मधलीवाडी ता. गुहागर) या त्यांच्या मुलीसह मुंबई येथे जाण्याकरता चिपळूण रेल्वे स्थानकावर आल्या होत्या. त्या पॅसेंजर रेल्वेच्या डब्यात चढत असताना पाठीमागे असलेल्या त्यांच्या मुलीने आपल्या आईला तुझ्या पर्सची चेन उघडी कशी काय आहे असं विचारलं. त्यावेळेला सुहासिनी चव्हाण यांनी आपली पर्स तपासली असता त्यात पर्समधील सोन्याचे दागिने गायब झाल्याचं त्यांच्या लक्षात आलं.याप्रकरणी चिपळूण पोलीस स्थानकात तक्रार दाखल केल्यानंतर भा. दं. वि. कलम 379 अन्वये अज्ञाता विरुद्ध गुन्हा दाखल करण्यात आला आहे.
