राजापूर:- कर्नाटकमध्ये अवैधरित्या गुरांची वाहतूक करणाऱ्या टोळीला राजापूर पोलिसांनी थरारक पाठलाग करत पकडले. सोमवारी रात्री १०.१५ वाजण्याच्या सुमारास ओणी-पाचल मार्गावर हे थरारनाटय घडले. या प्रकरणी पोलिसांनी विवेक शामराव कांबळे (४१), प्रणव ऊर्प रोहित अजित कांबळे (२३ ) (दोघे राहणार पडलिहाळ, ता.निपाणी, जि.बेळगांव) तसेच तबरेज चांदमियाँ ठाकुर व चांदमियाँ अब्बास ठाकुर (.रा.परटवली ता.राजापूर) यांना अटक केली आहे. तशी माहिती राजापूर पोलीसांनी दिली आहे.
या प्रकरणी राजापूर पोलिसांनी दिलेल्या माहितीनुसार राजापूर पोलीस ठाण्याचे पोलीस नाईक सचिन वीर यांना ओणी ते पाचल या रोडने एका चार चाकी गाडीतून लांजा येथून निपाणी जि.बेळगाव येथे गुरे घेवून जाणार असल्याची गोपनीय माहिती प्राप्त झाली होती. त्यानुसार पोलीसांनी सापळा लावला होता. ओणी ते पाचल रोडवर सहाय्यक पोलीस निरीक्षक अमोल गोरे, पोलीस नाईक सचिन वीर, पोलीस शिपाई श्री.घोगले, श्री.घोळवे तसेच वाहन चालक श्री.बाणे असे पेट्रोलिंग करीत असताना ओणी-पाचल अशी पेट्रोलिंग करीत असताना १०.१५ वा.चे दरम्यान ओणी दैतवाडी गणेश मंदिर येथून चार चाकी काळसर इंडिगो गाडी व त्याच्या मागून एक महेंद्रा जिनिओ गाडी (क.एम.एच.०४/एफपी/६४२४) ही भरधाव वेगामध्ये पाचल दिशेला जात असताना दिसुन आली.
त्यावेळी दोन्ही गाड्यांना थांबण्याचा इशारा दिला असता सदर दोन्ही गाडी वरिल चालकाने गाडी न थांबवता गाडी पुढे पाचलच्या दिशेने घेवुन निघाले. महेंद्रा जिनिओ गाडीचा हौदा कापडाने झाकलेल्या स्थितीत बंद असल्याने सदर गाडीचा संशय आला म्हणून सदर दोन्ही वाहनांचा पाठलाग करुन काही अंतरावर चार चाकी काळसर इंडिगो गाडी पोलिसांची गाडी पुढे जाण्यास न देता अटकाव करीत होती. मात्र पोलिसांनी पाठलाग सुरूच ठेवत पुढे जावुन काही अंतरावर सौंदळ पाटीलवाडीचे जवळ वळणावर गाड्या अडविल्या.
यावेळी पोलिसांनी गाड्यांची तपासणी केली असता गाडीच्या हौद्यामध्ये १ बेल व ७ गायी मर्यादिपेक्षा जास्त प्रमाणात बसवून त्यांना आखुड दोरीने बांधून व कोंबुन भरून निपाणी येथे कत्तलीसाठी घेवून जात असल्याचे तपासात निष्पन्न झाले. त्यामुळे पोलिसांनी विवेक कांबळे, पणव ऊर्प रोहित कांबळे तसेच तबरेज ठाकुर व चांदमियाँ ठाकुर यांच्या विरोधात गुन्हा दाखल करून अटक केली आहे. तसेच त्यांच्याजवळील चार चाकी महेंद्रा जिनिओ गाडी व १ बैल, ७ गायी असा माल जप्त करण्यात आलेला आहे. या चारही जणांच्या विरोधात गुन्हा दाखल करण्यात आला आहे.
