रत्नागिरी:- महाराष्ट्र राज्य कृषी पणन मंडळामार्फत हापूस आंबा थेट विक्रीसाठी बाजारपेठ उपलब्ध करण्याच्या दृष्टीने उत्पादक ते ग्राहक थेट विक्री उपक्रम राबविला जातो. कोरोनामुळे मागील दोन वर्षे अनेक अडचणींचा सामना आंबा उत्पादकांना करावा लागला. मात्र, यंदा आंबा उत्पादकांसाठी आंबा विक्रीकरिता स्टॉल उपलब्ध होण्यासाठी आज दि 7 मार्च 2022 पासून नोंदणी सुरु करण्यात येणार असल्याची माहिती कृषी पणन मंडळाचे उपसरव्यवस्थापक डॉ. भास्कर पाटील यांनी दिली.
इच्छुक आंबा बागायतदारांनी महाराष्ट्र राज्य कृषी पणन मंडळाचे विभागीय कार्यालय, शांतीनगर, नाचणे, रत्नागिरी अथवा कपिल खामकर, कृषी व्यवसाय पणन तज्ज्ञ यांच्याशी संपर्क साधून नावनोंदणी करावी, करावी, असे आवाहन सहाय्यक सरव्यवस्थापक, महाराष्ट्र राज्य कृषी पणन मंडळ, विभागीय कार्यालय, रत्नागिरी यांनी केले आहे.
स्टॉल नोंदणीकरिता आंबा नोंदीसह सातबारा उतारा (मागील 6 महिने कालावधीतील), आधार कार्ड तसेच स्टॉलवर विक्री करणा-या कुटुंबातील व्यक्तीचे आधार कार्ड प्रत व लसीचे दोन डोस घेतल्याचे प्रमाणपत्र, भौगोलिक मानांकन नोंदणी प्रमाणपत्र प्रत, महाराष्ट्र राज्य कृषी पणन मंडळाच्या नावे दहा हजार अनामत रक्कमेचा धनाकर्ष अथवा यापूर्वी अनामत रक्कम भरणा केली असल्यास पावतीची प्रत तसेच विहीत नमुन्यातील अर्ज व हमीपत्र आदी कागदपत्रे नोंदणीसाठी आवश्यक आहेत.
