रत्नागिरी:- बेकरी मालाची विक्री केल्यानंतर पैशाची विचारणा केली. या रागातून बिअरची बाटली डोक्यात मारुन दुखापत करणाऱ्या संशयिताविरुद्ध ग्रामीण पोलिस ठाण्यात गुन्हा दाखल करण्यात आला आहे. प्रसाद बोरकर असे संशयिताचे नाव आहे. ही घटना रविवारी (ता. १७) दुपारी सव्वा तीनच्या सुमारास एमआयडीसी मिरजोळे येथे घडली.
पोलिसांकडून मिळालेल्या माहितीनुसार फिर्यादी राकेश सुरेश शिंदे (वय ३७) हे रत्नागिरी बेकरीमध्ये कामाला आहेत. तर संशयित हा गेले दोन महिने राकेश शिंदे यांच्याबरोबर चालक म्हणून आहे. गुरुवारी (ता. १४) ला संशयिताने बेकरीच्या मालाची विक्री करुन हिशोब न देता निघून गेला. रविवारी दीडच्या सुमारास बेकरी मालकीन हीने संशयिताला बेकरीच्या मालाचे पैशाबाबत विचारणा केली असता तो त्यांच्याकडे वादविवाद करत होता. त्यावेळी फिर्यादी यांनी त्याला समजावले, त्याचा राग मनात धरुन संशयिताने फिर्यादी यांच्या डोक्यात बिअरची काचेची बाटली मारुन दुखापत केली. या प्रकरणी राकेश शिंदे यांनी ग्रामीण पोलिस ठाण्यात तक्रार दिली. तक्रारीवरुन पोलिसांनी संशयिताविरुद्ध गुन्हा दाखल केला आहे. अधिक तपास ग्रामीण पोलिस अमंलदार करत आहेत.
