रत्नागिरी:- शहरानजीकच्या जांभुळ फाटा ते पाटीलवाडी जाणाऱ्या रस्त्यावर कालिकामाता मंदिर येथील पुलाच्या निर्जन ठिकाणी. तसेच खडपेवठार येथील फणसाच्या झाडाखाली व आठवडा बाजार येथे विनापरवाना हातभट्टी दारु विक्री व मद्य सेवन करणाऱ्या तिघांविरुद्ध शहर पोलिस ठाण्यात गुन्हा दाखल करण्यात आला आहे. सुनिल सदाशिव जाधव (५०), बिपिन महादेव शेट्ये (४२, विश्वनाथ नथुराम मोरे ३८ अशी संशयितांची नाव आहेत. या घटना रविवारी (ता. १७) सायंकाळी पावणेसहा ते रात्री आठच्या सुमारास निदर्शनास आल्या.
पोलिसांकडून मिळालेल्या माहितीनुसार पोलिसांनी केलेल्या कारवाईत जांभुळ फाटा येथे विनापरवाना २ हजार २५ रुपयांची दारु जप्त केली. खडपेवठार येथील फणसाच्या झाडाखाली ८२० विदेशी दारु सापडली तर तिसरा संशयित मद्य प्राशन करत असताना निदर्शनास आला. या प्रकरणी पोलिस कॉन्स्टेबल कौस्तुभ जाधव, संतीश राजरत्न व पोलिस हेड कॉन्स्टेबल वैभव नार्वेकर यांनी शहर पोलिस ठाण्यात तक्रार दिली. तक्रारीवरुन पोलिसांनी संशयिताविरुद्ध गुन्हा दाखल केला आहे.
