देवरूख:- शहरातील रोहिदास आळी येथे भरदिवसा घरफोडी होवून सोने दागिने, चांडो, रोख रक्कम असा एकूण 7 लाख 36 हजार रूपये किंमता ऐवज चोरट्यांनी लंपास केल्यी घटना सोमवारी दुपारी घडली. या प्रकरणी अज्ञात चोरट्यावर देवरूख पोलीस ठाण्यात गुन्हा दाखल करण्यात आला आहे
देवरूख पोलीस ठाण्यातून मिळालेल्या माहितीनुसार, या बाबतची फिर्याद संतोष बापू कदम (रा. रोहिदास आळी, देवरूख) यांनी दिली. संतोष कदम व घरातील मंडळी सोमवारी दुपारी 3 ते 5 या कालावधीत कामानिमित्त बाहेर गेली होती. याची संधी साधत कदम यांच्या घराच्या पाठीमागील दरवाजाची कडी हत्याराने उचकटून आतमध्ये प्रवेश केला. कदम हे काम आटोपून घरी आले असता चोरी झाल्याचा प्रकार त्यांच्या निदर्शनास आला. या घटनेची माहिती कदम यांनी देवरूख पोलिसांना दिली. या घटनेची माहिती मिळताच पोलीस निरीक्षक अतुल जाधव, पोलीस निरीक्षक नामदेव जाधव, संदीप जाधव, श्रीकांत जाधव यांनी घटनास्थळी जावून पाहणी व पंचनामा केला. या चोरीचा पर्दाफाश करण्यासाठी श्वानपथक, ठसे तज्ञ यांना पाचारण करण्यात आले होते. हे श्वानपथक परिसरात घुटमळले.
या चोरीत कदम यांचे 93 ग्रॅम वजनाचे 6 लाख 56 हजार रूपये किमतीचे सोन्याचे दागिने, 10 हजार रूपये किंमतीची चांदीची मोड, 70 हजार रूपये रोख रक्कम असा एकूण 7 लाख 36 हजाराचा ऐवज चोरट्याने लंपास केल्याचे नमूद करण्यात आले आहे. तसेच संतोष कदम यांचे शेजारी राहणारे सीताराम तुकाराम कदम यांच्या घरातून 35 हजार रूपये रोख रक्कम लंपास केली. अज्ञात चोरट्यावर देवरूख पोलीस ठाण्यात भारतीय न्याय संहिता अधिनियम 2023 चे कलम 331 (3), 305 (क) अन्वये गुन्हा दाखल करण्यात आला आहे.
