गुहागर:- गणेशोत्सवासाठी मुंबई नालासोपारा येथून गुहागर तालुक्यातील उमराठ गावामध्ये येणाऱ्या मुंबई चाकरमान्यांच्या एसटी बसला खासगी ट्रॅव्हल्सच्या बसने धडक दिल्याने अपघात झाला. यामध्ये ७ ते ८ जणांना डोक्याला व तोंडाला मार बसला असून इतर किरकोळ जखमी आहेत. हा अपघात पिंपर जामसुत रस्त्यावर जामसुत सीमेवर पहाटे घडला.
मुंबई नालासोपारा येथून गुहागर तालुक्यातील उमराठ गावातील घाडेवाडी व मराठवाड्यातील गणेश भक्त चाकरमानी एसटी महामंडळाची स्वतंत्र गाडी करून गावी येत होते. जामसुत पिंपर या मार्गावर जामसुत सीमेवर समोरून येणाऱ्या खासगी ट्रॅव्हल्स ने धडक दिली. चालकाच्या बाजूने धडक दिल्याने समोरील सीटवर आपटल्याने त्यांच्या डोक्याला व नाकाला मार बसला आहे व इतरांना किरकोळ मार बसला आहे. एकूण १७ जणांवर हेदवी प्राथमिक आरोग्य केंद्रामधे उपचार सुरू आहेत. तर ठोकर देणाऱ्या खाजगी ट्रॅव्हलच्या चालकाने यावेळी बससह पलायन केले.
