राजापूर:- मुंबई गोवा महामार्गावरील राजापूर गंगा तिठा येथे बुधवारी रात्री 10 वाजण्याच्या सुमारास विचित्र पध्दतीने अपघात झाला. या अपघातात भाजी विक्रेता निखिल पोपट साळुखे (वय 32 रा. आष्टा सांगली) हा जागीच ठार झाला तर त्यांच्यासोबत असणाऱ्या नकुशा प्रकाश पांचाळ (राहणार सांगली) या गंभीर जखमी झाल्या.
मिळालेल्या माहितीनुसार मुंबई गोवा महामार्गावर राजापूर गंगा तिठा येथे सांगली जिल्ह्यातील आष्टा येथील भाजी विक्रेते कुटुंब जेवण करण्यासाठी महामार्गाच्या बाजुला बसले होते. याच दरम्यान महामार्गावरुन जाणाऱ्या एका ट्रकला समोरून येणाऱ्या कंटेनरची जोरदार धडक बसली. या धडकेमध्ये कंटेनरचा फाळका तुटून तो या जेवण करणाऱ्या कुटुंबाच्या अंगावर येऊन पडला. यामध्ये भाजी विक्री करणारे निखिल पोपट साळुखे (वय 32 रा. आष्टा सांगली) हे जागीच ठार झाले तर त्यांच्यासोबत असणाऱ्या नकुशा प्रकाश पांचाळ (राहणार सांगली) या गंभीर जखमी झाल्या आहेत. नकुशा या गेली अनेक वर्ष सांगली येथून स्वतः बोलेरो पिकअप भाजी भरून घेवून कोकणात येवून त्याची विक्री करतात. या अपघाताची खबर राजापूर पोलिस ठाण्यात उज्वला भारत सरगर यानी दिली असून त्यानंतर राजापूर पोलिसानी लागलीच घटना स्थळी धाव घेतली.
