रत्नागिरी:- मुंबई-गोवा महामार्गावर गस्त घालत असताना स्थानिक गुन्हे अन्वेषण शाखेच्या पोलिसांनी पंधरा लाखांच्या मांडूळ जातीच्या सापांसह तिघांना जेरबंद केले आहे. शुक्रवारी ही कारवाई करण्यात आली असून यात मोठे रॅकेट सक्रिय असल्याची चर्चा आहे.
स्थानिक गुन्हे अन्वेषण शाखेच्या पथकास मिळालेल्या बातमीच्या आधारे पोलीस स्टाफ सरकारी व खाजगी वाहनाने मुंबई गोवा हायवे रोडवर हातखंबा ते संगमेश्वर असे पेट्रोलिंग करीत होते. रत्नागिरी ग्रामीण पोलीस ठाणे हद्दित मौजे निवळी बावनदी येथील बस स्टॉप रोडवर एक चार चाकी वाहन संशयास्पदरित्या दिसून आले. सदर वाहन तसेच वाहनातील इसमांची झडती घेतली असता, चार चाकी वाहनामध्ये एक वन्यजीव जिवंत मांडुळ जातीचा साप मिळून आल्याने वनपाल पाली श्री.गौतम कांबळे यांना त्यांचे स्टाफसह घटनास्थळी बोलावून घेऊन खात्री करण्यात आली. सदर वाहनामध्ये वन्य जीव मांडुळ जातीचा साप मिळुन आल्याने सदर वाहनातील इसमांकडे चौकशी केली असता सदर वन्य जीव मांडुळ जातीचा जिवंत साप हा विक्रीकरीता आणला असल्याची माहिती समोर आली.
गाडीतील सतीश युवराज मंडले (वय-२५, रा.वाकुर्डे, ता.शिराळ, जि. सांगली), सुरेश सुनिल भोसले (वय -२९ वर्षे, रा. शिवडे, ता.कराड, जि. सातारा), महोदव गोरख लोंढे (वय -३९ वर्षे रा. कोपर्डी, हवेली, ता.कराड, जि. सातारा) यांना ताब्यात घेण्यात आलेले असून त्यांचेकडुन १५ लाख किंमतीचे वन्य जीव मांडुळ जातीचा जिवंत साप तसेच त्यांचे ताब्यातील बोलेरो गाडी (क्र. एमए- ५०- ए -०४५०) जप्त करण्यात आलेली आहे.
सदरची कामगिरी मा.अपर पोलीस अधीक्षक, रत्नागिरी श्रीमती जयश्री देसाई यांचे मार्गदर्शनाखाली पोलीस निरीक्षक एलसीबी, पोउनि विकास चव्हाण, पोहेकॉ प्रशांत बोरकर, सुभाष भागणे, नितीन डोमणे, अरुण चाळके, पोना बाळु पालकर, अमोल भोसले, विजय आंबेकर, उत्तम सासवे, सत्यजित दरेकर, प्रविण खांबे, गुरुप्रसाद महाडीक चालक दत्तात्रय कांबळे यांनी केलेली आहे.
