आमदार राजन साळवी ; एसीबी चौकशी नोटीशीला घाबरत नाही
रत्नागिरी:- मला धमकी देण्याचा प्रयत्न करू नये. लाचलुचपत विभागाकडू चौकशीची नोटिस आली आहे. त्याला मी समोर जाणार आहे. मी स्वच्छ आहे, त्यामुळे अशा स्वरुपाच्या धमक्यांना घाबरत नाही. हिमंत असेल तर जेलमध्ये टाकून दाखवा, संपुर्ण शिवसेना माझ्या पाठिशी आहे, असा इशारा उध्दव बाळासाहेब ठाकरे शिवसेना पक्षाचे उपनेते आमदार राजन साळवी यांनी दिला. मी पंधरा दिवसांची मुदतवाढ मागितली आहे. ती दिली नाही तर मला अटक करून न्यावी, असेही त्यांनी सांगितले.
रत्नागिरीतील आठवडा बाजार येथील शिवसेनेच्या कार्यालयात आयोजित पत्रकार परिषदेत ते बोलत होते.
ते म्हणाले, गेली अनेक वर्षे निष्ठावंत शिवसैनिक म्हणुन काम करत आहे. 20 जून नंतर शिवसेनेत राजकीय उलथापालथ झाली. त्यानंतर शिवसेना पक्षप्रमुख उध्दव ठाकरे यांच्याशी मी निष्ठावंत राहीलो. म्हणुन एसीबीची नोटिस प्राप्त झाली आहे. ही चौकशी करणार आणि पुढील निर्णय होणार आहे. देशात, राज्यातील सरकारकडून विरोधी पक्षातील नेत्यांवर केंद्रीय आणि राज्य यंत्रणाच्या माध्यमातून दबाव टाकला जात आहे. त्यामुळेच मला नोटिस मिळाली आहे. माझ्या मालमत्तेची चौकशी केली तरीही काहीच हरकत नाही. बाळासाहेब ठाकरे यांनी पाठीवर थाप मारल्यामुळे जी निष्ठावंतांची श्रीमंती आमच्याकडे आहे. शिवसैनिक हीच आमची संपत्ती आहे. वडापाव खाऊन आम्ही शिवसेना वाढवली ती चूक केली. जनतेच्या हितासाठी तुरुंगवास भोगलाय, जेलमध्ये राहिलो तरीही उद्धव बाळासाहेब ठाकरे यांच्याच सोबत आम्ही राहणार आहोत. एसीबीच्या नोटीसीमधील प्रकरण काय हे मला माहित नाही, न्यायव्यस्थेवर माझा पूर्ण विश्वास आहे. काहीही परिस्थिती ओढवली तरीही शिंदे गटात जाणार नाही अशा शब्दात ठणकावले.
आमदार साळवी म्हणाले, माझा आत्मविश्वास ठाम आहे. कुठल्या यंत्रणेला मी घाबरत नाही. एसीबीची नोटिस प्राप्त झाल्यानंतर पक्षप्रमुख उद्धव ठाकरे यांच्याशी बोललो. त्यांनी पाठिशी राहण्याचे आश्‍वासन दिले असून शिवसेना पाठीशी राहील. शिवसेनेत मी माझ्या पायावरती ठाम उभा आहे. माझे उत्पन्न, खर्च आणि मालमत्ता खर्चा संदर्भात जवाब नोंदवयला बोलावले आहे. मी 15 दिवसांची मुदतवाढ मागीतली आहे. मुदतवाढ दिली नाही तर मला अटक करून न्यावी. माझ्या विरुद्ध कुणी एका व्यक्तीने नोटिस दिली आहे. राज्य सरकारच्या अधिपत्याखालच्या एजन्सी माध्यमातून नोटिस आली आहे. प्रसंगी जेलमध्ये जाईन, मरेपर्यत जेलमध्ये रहायची माझी तयारी आहे. पण पायाशी जाणार नाही. हिंमत असेल तर गुन्हा दाखल करून दाखवा, ही लढाई मी लढणार आहे. मी पळून जाणार नाही. शिवसेनेचे 40 वर्ष काम करतोय, मरेपर्यत उद्दव ठाकरे यांचा शिवसैनिक आहे.
