चिपळूण:-पिनकोड हॅक करून वडिलांच्या बँक खात्यातील पैसे मुलीच्या बँक खात्यात जमा करून २ लाख ६३ हजार ८७० रुपये इतकी रक्कम ऑनलाईन काढून फसवणूक केल्याची घटना सावर्डे येथे घडली. या प्रकरणी शरद गंगाराम शिवडे (५२, डेरवण) यांनी पोलिस स्थानकात फिर्याद दाखल केली.
शिवडे यांचा मोबाईल बँक खात्याला लिंक केला आहे. तसेच शिवडे यांची मुलगी साक्षी हिचेही वडिलांच्या बँकेत बचत खाते असून त्यास दुसरा एक मोबाईल लिंक करण्यात आला आहे. २१ ते २९ फेब्रुवारी या कालावधीत अज्ञाताने शिवडे व त्यांची मुलगी यांच्या बँक खात्यांचे पासवर्ड व गोपनीय पिनकोड हॅक करून ऑनलाईन व्यवहाराद्वारे दोन्ही बँक खात्यातील २ लाख ६३ हजार ८७० रुपये इतकी रक्कम काढून फसवणूक केली.
हा प्रकार शिवडे यांच्या लक्षात आल्यानंतर त्यांनी या प्रकरणी सावर्डे पोलीस स्थानकात फिर्याद दिली असून अज्ञातावर गुन्हा दाखल करण्यात आला आहे.
