राजापूर:- पर्ससीन मासेमारीला बंदी असतानाही बंदी आदेशाचा भंग करून पर्ससीन मच्छीमारी करणाऱ्या राजापूर साखरीनाटे येथील मिनी पर्ससीन नौकेला मत्स्य व्यवसाय विभागाच्या गस्तीपथकाने विजयदुर्ग समुद्रात पकडून कारवाईचा बडगा उगारला.
मस्त्य व्यवसाय विभागाच्या शीतल गस्तीनौकेद्वारे समुद्रात गस्त घालताना विजयदुर्ग समुद्रात शनिवारी रात्री एक मिनी पर्ससीन नौका पर्ससीन मच्छीमारी करताना आढळली. ही नौका साखरीनाटे येथील अमिना इलियास मौसा यांच्या मालकीची असून पर्ससीन मासेमारी परवांना नसताना, नौका नोंदणी नसताना, नौकेवर नाव नसताना या नौकेद्वारे पर्ससीन मच्छीमारी करताना मत्स्य व्यवसाय विभागाने पकडले. पर्ससीन मच्छिमारी बंदी आदेशाचा भंग केल्याप्रकरणी या नौकेवर मत्स्य व्यवसाय विभागाने कारवाई केली असून ही नौका पुढील कारवाईसाठी विजयदुर्ग बंदरात आणून ठेवली आहे. या नौकेवर १२ खलाशी आहेत. ही कारवाई मत्स्य व्यवसाय विभागाचे परवाना अधिकारी रवींद्र मालवणकर, पो. कॉ. नीलेश पाटील, सागरी सुरक्षारक्षक धाकोजी खवळे, संतोष ठुकरूल, हरेश्वर खवळे, अमित बांदकर, योगेश फाटक, सुंदर घारकर यांनी केली.
