रत्नागिरी:- शहरातील अभ्युदयनगर-गोडबोले नगरमधील प्राथमिक शाळेचे आरक्षण बदलून तेथे आध्यात्मिक केंद्र असे आरक्षण टाकण्याची भूमिका बारगळली आहे. आता हे आध्यात्मिक केंद्र शहरातील एखाद्या उद्यानात उभारण्याचा विचार सुरू झाला आहे.
अभ्युदयनगर – गोडबोले नगरातील आरक्षण क्रमांक 106 ची जागा प्राथमिक शाळेच्या प्रयोजनासाठी रत्नागिरी नगर परिषदेला देण्यात आली. येथे भास्कर दत्तात्रय गोडबोले प्राथमिक विद्यामंदिर सुरू होते. ही शाळा बंद पडल्याने या जागेतील प्राथमिक शाळेचे आरक्षण बदलून तेथे आध्यात्मिक केंद्र आरक्षण करण्याचा ठराव करण्यात आला. पुढील प्रक्रियेनुसार नागरिकांच्या सूचना आणि आक्षेप मागवण्यात आले. नागरिकांनी आक्षेप घेवून आरक्षण बदलण्यास नापसंती दर्शवली. रत्नागिरी नगर परिषदेने नागरिकांच्या आक्षेपाची दखल घेत आरक्षण क्रमांक 6 चे आरक्षण बदलण्याचा विचार सोडून दिला आहे.
आता हे आध्यात्मिक केंद्र शहरातील कोणत्या उद्यानात होऊ शकेल याची चाचपणी सुरू आहे. आरक्षण बदलण्याबाबत सामाजिक कार्यकर्ते अ‍ॅड. अमेय परुळेकर यांनी पत्रकार परिषद घेऊन विरोध दर्शवला होता.
