रत्नागिरी:- वैद्यकीय शिक्षण देण्याच्या नावाखाली ठाण्यातील संस्थाचालक मालकाने तब्बल 7 लाखांचा चुना लावल्याचा प्रकार समोर आला आहे. फसवणुकीची ही घटना 13 जून 2018 ते 7 डिसेंबर 2022 या कालावधीत घडली असून या प्रकरणी गुन्हा दाखल करण्यात आला आहे.
एज्युकेशन ओव्हरसिज कन्सल्टन्सी नामक संस्थेचे सागर साळवी (रा. नवपाडा ठाणे) असे शहर पोलीस ठाण्यात गुन्हा दाखल करण्यात आलेल्या संशयिताचे नाव आहे. त्याच्या विरोधात जगन्नाथ रमाकांत जुवळेकर (53, रा. पऱ्याची आळी, रत्नागिरी ) यांनी पोलिसांकडे तक्रार दिली आहे. त्यानुसार,जगन्नाथ जुवळेकर यांच्या मुलीला वैद्यकीय क्षेत्रात करियर करायचे असल्याने त्यासाठी त्यांनी ठाणे येथील एज्युकेशन ओव्हरसिज कन्सल्टन्सीचे सागर साळवी यांच्या खात्यात 6 वर्षांची 18 लाख रुपये फी जमा केली. परंतु सागर साळवी याने त्यातील फक्त अडीच वर्षांची फी वैद्यकीय कॉलेजला भरून उर्वरित 7 लाख रुपयांची फसवणूक केली. याबाबत जुवळेकर यांनी सागर साळवी याला फोनद्वारे वारंवार विचारणा केली पण सागरने पैसे देण्यास टाळाटाळ केली. म्हणून जुवळेकर हे ठाणे येथील सागरच्या ऑफिसला गेले असता त्या ठिकाणचे कार्यालय देखील बंद असल्याने आपली फसवणूक झाल्याचे लक्षात येताच त्यांनी बुधवारी शहर पोलीस ठाण्यात तक्रार दिली. याप्रकरणी अधिक तपास शहर पोलीस करत आहेत.
