संगमेश्वर:- संगमेश्वर तालुक्यातील वांद्री प्राथमिक आरोग्य केंद्राचे वैद्यकीय अधिकारी डॉ. शिवकुमार फासके यांना अनोळखी तरुणाने मारहाण केल्याची घटना घडली आहे. गाडीतून लिफ्ट देणे डॉ. फासके यांना भारी पडले असून मारहाण करणाऱ्या तरुणाला पोलिसांनी ताब्यात घेतले आहे.
सविस्तर वृत्त असे की, डॉ. शिवकुमार फासके हे वांद्री प्राथमिक आरोग्य केंद्रातून काम आटोपून रात्री 9 वाजण्याच्या सुमारास बावनदी मार्गे देवरूखला जात होते. तळेकांटे दरम्यान त्यांना एक तरुण चालताना दिसला. त्याने गाडीला हात दाखवताच डॉ. फासके यांनी गाडी थांबवून त्याला गाडीत घेतले आणि पुढील प्रवासाला जात असताना चहा पिण्यासाठी त्यांनी गाडी बावनदी येथे टपरीजवळ थांबवली. त्यालाही चहा दिला. मात्र चहा पीत असतानाच त्या तरुणाने डॉ. फासके यांच्या चारचाकी गाडीची चावी मागितली. डॉक्टरांनी चावी कशाकरता हवी आहे असे विचारले असता त्या तरुणाने डॉक्टरांना मारहाण करण्यास सुरुवात केली. हाताने तसेच दगडाने जोरदार मारहाण केली. यामध्ये ते गंभीर जखमी झाले. तरुणाने तिथून पोबारा केला. डॉक्टर शिवकुमार फासके हे गंभीर जखमी झाले. डॉक्टरांना मारहाण झाल्याची बातमी वांद्री येथे कळताच येथील ग्रामस्थ अमित मयेकर, सिद्धेश मयेकर, ऋषिकेश पाटील, रोहित पाटील, मारुती नागवेकर, कौस्तुभ नागवेकर, परेश पाटील यांनी घटनास्थळी धाव घेतली. संगमेश्वर पोलिस स्थानकाचे पोलीस निरीक्षक उदय झावरे यांच्यासह अन्य कर्मचारी घटनास्थळी दाखल झाले. मारहाण करणाऱ्या तरुणाला शोधण्याचे प्रयत्न सुरू होते. ग्रामस्थांनी सलग तीन तास जंगल भागात जाऊन शोध घेतला. शेवटी मारहाण करणाऱ्या तरुणाला ताब्यात घेत पोलिसांच्या ताब्यात देण्यात आले. पोलिसांनी खाक्या दाखवताच त्याने आपले नाव फारूक जहांगीर लसकर ( मालाड पूर्व मुंबई) असे सांगितले.
