१ मे पासून मागणीत वाढ ; पालिकेतर्फे आतापर्यंत ३९१ फेऱ्या
रत्नागिरी:- शहरातील पाणीटंचाई अधिक गडद होत चालली आहे. दिवसाआड पाणीपुरवठा केल्यापासून एप्रिल महिन्यात दरदिवसी टंचाईग्रस्त भागात ५ ते ६ टॅंकर लागत होते; मात्र मे महिन्यापासून पाण्याची मागणी वाढली आहे. आता दिवसाला १० ते १५ टॅंकरच्या फेऱ्या होत असून, आतापर्यंत ३९१ फेऱ्या झाल्या आहेत. शहराच्या वरच्या भागात सर्वाधिक टॅंकर लागत आहेत. म्हणजे नियमित २१ एमएलडी पाणीपुरवठ्यासह दिवसाला १ लाख ५ हजार लिटरच्यावर पालिकेला टॅंकरद्वारे जादा पाणीपुरवठा करावा लागत आहे.
रत्नागिरी शहराला यंदाही भीषण पाणीटंचाईचा सामना कारावा लागत नसला तरी मोठ्या प्रमाणात पाणीटंचाई भासत आहे. शहरात सुमारे साडेदहा हजार नळजोडण्या आहेत. दरदिवशी शहराला शीळ धरणातून सुमारे २१ एमएलडी पाणीपुरवठा केला जातो. त्यात सुधारित पाणीपुरवठा योजना सुरू झाल्याने गळतीचे प्रमाण ४० टक्क्यावरून शुन्यावर आले आहे; परंतु वारंवार नवीन पाईपलाईन फुटत असल्याने गळतीच्या तक्रारी काही कमी होताना दिसत नाहीत. हवामान खात्याने वर्तवलेल्या अंदाजानुसार, यंदा पाऊस लांबण्याची शक्यता आहे. त्यानुसार रत्नागिरी पालिका प्रशासनाने पाणीपुरवठ्याचे नियोजन केले आहे.
शीळ धऱणामध्ये १५ जूनपर्यंत पुरेल एवढा पाणीसाठी आहे; परंतु पाऊस लांबला तर पाण्याची भीषण टंचाई भासू शकते म्हणून १७ एप्रिलपासून शहरात दिवसाआड पाणीपुरवठा सुरू केला.
शहरात नियमित २१ एमएलटी पाणीपुरवठा केला जातो; परंतु दिवसाआड पाणी येत असल्याने मोठ्या प्रमाणात साठवणूक होते. ज्याला मिळते त्याला मिळते अन्यथा अनेकांची भांडी रिकामी राहातात. शहरात ज्या भागात कमी दाबाने पाणी जाते त्या भागात पाणीटंचाई भासत आहे. अशा भागात पालिकेच्या ४ हजार आणि ३ हजार लिटरच्या टॅंकरद्वारे मोफत पाणीपुरवठा सुरू आहे. १७ एप्रिलनंतर या भागांमध्ये दिवसाला ५ ते ६ टॅंकर जात होते. १ मे पासून त्यामध्ये मोठी वाढ झाली आहे. दिवसाला १० ते १५ टॅंकरद्वारे पाणीपुरवठा होत आहे. म्हणजे दरदिवशी १ लाख ५ हजार लिटर जादा पाणीपुरवठा पालिकेला करावा लागत आहे.
शहरात १७ एप्रिलपासून दिवसाआड पाणीपुरवठा सुरू केला. तेव्हा दिवसाला ३ ते ५ टॅंकर जात होते; मात्र १ मे पासून पाण्याची मागणी वाढली आहे. दिवसाला १० ते १५ टॅंकरची मागणी आहे. आतापर्यंत ३९१ फेऱ्या झाल्या आहेत.
-जितेंद्र विचारे, अग्निशमन विभागाचे अधिकारी
