रत्नागिरी:- मुख्यमंत्री एकनाथ शिंदे यांचा रत्नागिरी दौरा डिसेंबर महिन्यात होणार असून त्यांच्या जंगी स्वागतासाठी कायकर्त्यांनी तयारी करा अशा सुचना पालकमंत्री उदय सामंत यांनी सोमवारी (ता. 28) सायंकाळी झालेल्या बैठकीत दिल्या आहेत. 10 डिसेंबरला ते येण्याची शक्यता असून निश्‍चित तारीख दोन दिवसांमध्ये समजणार आहे. यावेळी रत्नागिरी शहरातील मुख्य विकास कामांची उद्घाटनेही होणार आहेत.
महाविकास आघाडीला धक्का देत एकनाथ शिंदेंंच्या सहकार्याने भाजप आणि बाळासाहेबांची शिवसेना युतीची सत्ता राज्यात आली. शिवसेनेचा बालेकिल्ला म्हणून ओळखल्या जाणार्‍या रत्नागिरी जिल्ह्यात मुख्यमंत्री एकनाथ शिंदे दौरा करतील असे अपेक्षित होते. रत्नागिरीचे आमदार तथा विद्यमान पालकमंत्री आणि खेड-दापोलीचे आमदार योगेश कदम हे बाळासाहेबांच्या शिवसेनेचे मुख्य शिलेदार आहेत. काही दिवसांपुर्वी मुख्यमंत्री खेडमध्ये खासगी दौर्‍यावर येऊन गेले होते. तत्पुर्वी कोकणातील येथील शिवसैनिकांशी संवाद साधण्यासाठी ते अशी अपेक्षा होती. हा दौरा डिसेंबर महिन्यात होईल अशी आशा निर्माण झाली आहे. शुक्रवारी सायंकाळी बाळासाहेबांची शिवसेना पक्षाचे उपनेते पालकमंत्री सामंत यांनी कार्यकर्त्यांशी संवाद साधला. आगामी नगरपालिका निवडणुकीसाठी सज्ज राहण्याच्या सुचनाही दिल्या. यावेळी 10 डिसेंबरला मुख्यमंत्री रत्नागिरीत येण्याची शक्यता असल्याचे मंत्री सामंत यांनी सांगितले. ते प्रथमच रत्नागिरी दौर्‍यावर येत आहेत. त्यांच्या स्वागतासाठी पदाधिकारी, कार्यकर्त्यांनी तयारी सुरु करा अशा सुचनाही दिल्या आहेत.
या दौर्‍यात शहरातील प्रमोद महाजन क्रीडा संकुलात सभा आयोजित करण्यात येणार असून माळनाका येथील तारांगणाचे उद्घाटन, लोकमान्य टिळक ग्रंथालयाचे भूमिपूजन आणि शासकीय तंत्रनिकेतनच्या नवीन इमारतीचे भूमिपूजन त्यांच्या हस्ते होण्याची शक्यता आहे. दौर्‍याच्या तारखेबाबत दोन दिवसात अंतिम निर्णय होणार आहे.
