रत्नागिरी:- दहशतवादी कारवाई प्रकरणी कोथरुडसह गोंदीया, रत्नागिरीतील पणदेरी येथून अटक करण्यात आलेल्या चार दहशतवाद्यांकडून बाँब तयार करण्याचे साहित्य, पांढर्या रंगाची पावडर असा मुद्देमाल जप्त करण्यात आला आहे. दहशतवाद्यांनी बाँब तयार करण्यासाठी कोंढव्यातील राहत्या घरात छोटी प्रयोगशाळा थाटल्याची धक्कादायक माहिती तपासात मिळाली आहे. तर दोघांना दिड वर्ष आर्थिक पुरवठा करणार्या अभियंता सिमाब नसरुद्दीन काझी याने दहशतवाद्यांसाठी थर्मामीटर, ड्रॉपर, पिपेट असे साहित्य खरेदी केल्याचे तपासात स्पष्ट झाले. तर याच्याकडे आर्थिक पुरवठा करण्याएवढा पैसा आला कोठून याचा शोध एटीएस करत आहे.
पुण्यातील कोथरूडमधून दुचाकी चोरीच्या प्रयत्नात असताना महम्मद इम्रान महम्मद युसूफ खान (वय २३) आणि महम्मद युसूफ महम्मद याकूब साकी (वय २४, दोघेही रा. चेतना गार्डन, मिठानगर, कोंढवा, मूळ रा. रतलाम, मध्य प्रदेश) यांना अटक करण्यात आली होती. दोघांना आश्रय देणार्या अब्दुल कादीर दस्तगीर पठाण (वय ३२, रा. कोंढवा) याला देखील अटक करण्यात आली होती. त्यानंतर एका खासगी कंपनीत कामाला असलेल्या अभियंता सिमाब नसरुद्दीन काझी (वय २७, रा. कौसरबाग, कोंढवा, मूळ रा. पणदेरी , रत्नागिरी) याला रत्नागिरीतून अटक करण्यात आली. याप्रकरणाचा तपास राज्य दहशतवाद विरोधी पथकाकडून (एटीएस) करण्यात येत आहे. काझी याने खान आणि साकी यांना आर्थिक रसद पुरविल्याचे तपासात उघड झाले आहे.
खान आणि साकी कोंढव्यातील मिठानगर भागात राहत होते. सोमवारी एटीएसच्या पथकाने दहशतवाद्यांच्या घरातून बॉम्ब तयार करण्याचे साहित्य जप्त केले. दोघांनी बॉम्ब तयार करण्यासाठी वापरण्यात येणारे रासायनिक पदार्थ आणि विविध उपकरणे घरात लपवून ठेवली होती. एटीएसने दोघांची कसून चौकशी केली. खान आणि साकी यांच्याकडून रासायनिक पावडर, चारकोल, थर्मामिटर, ड्रॉपर, सोल्डिंग गन, मल्टीमीटर, छोटे बल्ब, बॅटरी, घड्याळ (अलार्म क्लॉक) तसेच दुचाकी चोरी करण्यासाठी लागणारे साहित्य जप्त करण्यात आले.
अभियंता सिमाब काझी याने दहशतवाद्यांसाठी थर्मामीटर, ड्रॉपर, पिपेट असे साहित्य खरेदी केल्याचे तपासात स्पष्ट झाले असून खरेदी केलेली ठिकाणे या दहशतवाद्यांनी दाखवली आहेत. काझी याने दहशतवाद्यांना रोख आणि ऑनलाइन पद्धतीने पैशाची मदत केल्याचे तपासात निष्पन्न झाले आहे. खान आणि साकी यांनी कोल्हापूर, पुणे, सातारा जिल्ह्यातील जंगलात बाँबस्फोटाची चाचणी घेतली होती. खान आणि साकी जंगलात वास्तव्यास होते. त्यांच्याकडून तंबू जप्त करण्यात आला होता.
अब्दुल पठाणला त्याच्या बँक खात्यावर पैसे
सिमाबने देशविघातक कृत्यासाठी किती पैसे दिले?, त्याला कोणी मदत केली? याचा तपास करायचा असल्याने विशेष सरकारी वकील विजय फरगडे तसेच तपास अधिकारी सहायक पोलिस आयुक्त अरुण वायकर यांनी त्याच्या एटीएस कोठडीची मागणी केली. काझीने अब्दुल पठाणला त्याच्या बँक खात्यावर पैसे पाठविले. ते पैसे पठाणने महम्मद खान आणि महम्मद साकी यांना दिल्याचे वायकर यांनी न्यायालयास सांगितले. आरोपीच्या वतीने ॲड. यशपाल पुरोहित यांनी काम पाहिले.
