रत्नागिरी:- लांजा तालुक्यातील दत्तक ग्रहण केंद्रातील तत्कालीक अधिक्षिका आणि काळजीवाहक यांच्यावर निष्काळजीपणाचा ठपका ठेवून या प्रकरणी न्यायालयाने अधिक्षिका व काळजीवाहक आरोपी महिलांना प्रत्येकी साडेसात हजार रुपये दंड व ३ वर्षांच्या सश्रम कारावासाची शिक्षा ठोठावली.
केंद्रातील मनोविकारग्रस्त मुलाने एका बालिकेला लादीवर आपटले. त्यात तिचा मृत्यू ओढवला तर आणखी एका बालिकेला दुखापत केली.
अधीक्षिका सुरेखा शांताराम बिजीतकर (वय ३२, शेट्येवाडी, लांजा) व काळजीवाहक संगीता अनिल पवार (वय ४१ रा. रखांगी चाळ, लांजा) अशी शिक्षा झालेल्या महिलांची नावे आहेत. ही घटना २७ फेब्रुवारी २०२० दुपारी दीड ते सायंकाळी चारच्या सुमारास (कै.) जानकीबाई (अक्का) तेंडूलकर महिलाश्रम लांजा येथे दत्तक ग्रहण केंद्रामध्ये घडली होती. लांजा येथील दत्तक केंद्रामध्ये बालक दाखल होता. त्याच्या वर्तनाबाबत अधीक्षिका बिजीतकर आणि काळजीवाहक पवार यांना माहिती असूनदेखील अधीक्षिका सुरेखा बिजीतकर यांनी याबाबत जिल्हा बालकल्याण समिती रत्नागिरीला कळवले नाही. तसेच संगीता पवार या कर्णबधिर असल्याचे माहिती असूनही बिजीतकर यांनी दत्तक ग्रहण केंद्रात नेमणूक दिली. २७ फेब्रुवारीला बालकाच्या वर्तनाबाबत माहिती असूनदेखील ड्युटीवर असताना चार बालकांना पाळण्यात ठेवून २० मिनिटे दोघीही केंद्र सोडून बाहेर गेल्या होत्या. या दरम्यान या बालकाने केंद्रातील एका बालिकेचा पाळण्यातून बाहेर आलेला हात पिरगळून तिला पाळण्यातून बाहेर काढून लादीवर आपटले. यामध्ये तिचा मृत्यू झाला. तसेच केंद्रातील आणखी एका बालिकेला दुखापत केली. घटना घडल्यानंतर २ ते ३ तास अधीक्षिका व काळजीवाहक यांनी बालकांकडे लक्ष दिले नाही, अशी तक्रार या प्रकरणी जिल्हा बाल संरक्षण अधिकारी समृद्धी वीर यांनी लांजा पोलिस ठाण्यात तक्रार दिली. तक्रारीवरून पोलिसांनी हलगर्जीपणा व निष्काळजीपणामुळे बालिकेचा मृत्यू झाला व एका बालिकेला दुखापत झाल्याने भारतीय दंडविधान संहिता कलम ३०४ (अ) ३३७ बाल न्याय मुलांची काळजी आणि संरक्षण अधिनियम २०१५ चे कलम ७५ प्रमाणे लांजा पोलिस ठाण्यात गुन्हा दाखल करण्यात आला होता. तपास पोलिस उपनिरीक्षक श्वेता पाटील करत होत्या. तपासात पोलिसांनी संशयित महिलांना अटक करून दोषारोपपत्र न्यायालयात दाखल केले होते.
मंगळवारी (ता. २९) या खटल्याचा निकाल पॉक्सो विशेष न्यायालयात झाला. सरकारी पक्षातर्फे ११ साक्षीदार तपासण्यात आले. सरकारी अभियोक्ता अॅड. मेघना नलावडे यांनी काम पाहिले. विशेष पॉक्सो न्यायाधीश वैजयंतीमाला राऊत यांनी आरोपींना भादंवि कलम ३०४ (अ) अन्वये दोन वर्षांचा सश्रम कारावास व प्रत्येकी २ हजार दंड, ३३७ मध्ये ५०० रुपये दंड व १५ दिवस शिक्षा आणि बाल न्याय अॅक्ट ७५ मध्ये प्रत्येकी ५ हजार दंड व साडेसात हजार रुपये दंड व ३ वर्ष सश्रम कारावासाची शिक्षा ठोठावली. पैरवी अधिकारी म्हणून पोलिस कॉन्स्टेबल नरेश कदम यांनी काम पाहिले.
