रत्नागिरी:- जिल्ह्यातील प्राथमिक शिक्षकांचे दरमहाचे पगार व आर्थिक देयकाना विलंब होत असल्यामुळे आज सोमवारी जिल्हा परिषदेसमोर दुपारी ३ ते ५ या वेळेत धरणे आंदोलन करण्याचा निर्धार महाराष्ट्र राज्य प्राथमिक शिक्षक समितीने केला आहे, अशी माहिती जिल्हाध्यक्ष प्रकाश काजवे यांनी दिली.
निधी उपलब्ध असतानाही जिल्हा परिषद प्राथमिक शिक्षकांचा पगारासाठी वेळोवेळी विविध कारणाने विलंबाने होत आहे. तसेच वरिष्ठ वेतन श्रेणी फरक, नियमित वेतनश्रेणी शिक्षण सेवक फरक, मेडिकल बिल, भविष्य निर्वाह निधी ना परतावा उचल, इतर अर्थिक बिले, सेवानिवृत्त शिक्षकांच्या रक्कमा अंतिम धन, गटविमा इत्यादी देयके वेळेवर मिळत नाही सबब याबाबत मुख्य कार्यकारी अधिकारी, शिक्षणाधिकारी (प्राथमिक), मुख्य लेखा व वित्त अधिकारी यांना १३ एप्रिल २०२२ रोजी निवेदन दिले होते. यापूर्वीही वेळोवेळी पत्रव्यवहार व भेटीचे वेळी तोंडी चर्चा देखील झाली आहे. प्रत्यक्षात ठोस उपाययोजना झाल्याचे दिसून येत नसल्याने प्राथमिक शिक्षकांत नाराजीचा सूर उमटला आहे. वेळोवेळी कोणत्या ना कोणत्या कारणांमुळे विलंबाने होणार्‍या पगार व आर्थिक देयके यामुळे गृह कर्ज, बँक हप्ते भरणा होताना शिक्षकांना नाहक आर्थिक भुर्दंड सोसावा लागत आहे. यासाठी वेळीच ठोस उपाययोजना होणे आवश्यक आहे. म्हणून न्याय्य मागण्यांसाठी प्रशासनाचे लक्ष वेधण्यासाठी सनदशीर मार्गाने २५ एप्रिलला धरणे आंदोलन करण्यात येणार आहे. या आंदोलनासाठी जिल्ह्यातील सुमारे ४५० ते ५०० हुन अधिक शिक्षक सहभागी होणार आहेत. याबाबतचे निवेदन उपविभागीय अधिकारी, जिल्हा पोलीस अधीक्षक, पोलीस उपनिरीक्षक यांना देण्यात आले आहे.
