रत्नागिरी:- राज्य शासनाकडून २०२१ मध्ये जिल्ह्यात झालेल्या पोलिस शिपाई भरतीमध्ये बनावट प्रकल्पग्रस्त प्रमाणपत्र सादर केल्याचा प्रकार समोर आला आहे. बीड जिल्ह्यातील उमेदवाराने हा प्रताप केला. संबंधित तरुणाला भरती प्रक्रियेतून बाद करण्यात आले असून बनावट दस्ताऐवज सादर करून फसवणूक केल्याप्रकरणी शहर पोलिस ठाण्यात गुन्हा दाखल करण्यात आला आहे.
धर्मराज राम दुधाळ (वय २६, रा. पाथर्डीनगर, हिवरसिंगा ता. शिरूर, जि. बीड) असे संशयिताचे नाव आहे. त्याच्याविरुद्ध तत्कालीन रत्नागिरी जिल्हा पोलिस उपअधीक्षक (गृह) यांनी तक्रार दाखल केली आहे. पोलिसांकडून मिळालेल्या माहितीनुसार राज्य शासनाकडून पोलिस शिपाई भरती २०२१ घेण्याच्या सूचना सर्व जिल्हा पोलिसांना करण्यात आल्या होत्या. त्यानुसार मे महिन्यात रत्नागिरी जिल्हा पोलिसांकडून पोलिस शिपाई भरती घेण्यात आली.
पोलिस भरती प्रक्रियेमध्ये लेखी व शारीरिक चाचणी घेण्यात आली होती. यामध्ये बीड येथील धर्मराज दुपाल यांची इतर मागास प्रवर्ग प्रकल्पग्रस्त समांतर आरक्षणामध्ये निवड करण्यात आली होती. त्यासंबंधी दुधाळ याने आपण प्रकल्पस्त असल्याचे प्रमाणपत्र सादर केले होते.
कागदपत्रांची पडताळणी करताना पोलिसांनी प्रकल्पग्रस्त असल्याच्या प्रमाणपत्राची सत्यता तपासण्यासाठी बीड जिल्हाधिकारी यांच्याकडे पाठविले. बीड जिल्हाधिकारी यांनी संबंधित प्रमाणपत्र हे बनावट असून त्यातील माहिती ही अन्य एका व्यक्तीबाबत असल्याचे सांगितले. प्रमाणपत्र बनावट असल्याचे उघड होताच दुधाळ याची प्राथमिक चौकशी पोलिसांकडून करण्यात आली. यावेळी आपण बनावट प्रमाणपत्र तयार केल्याची कबुली दिली. या प्रकरणी दुधाळविरुद्ध भादवि कलम ४२०, ४६५, ४६८, ४७१ नुसार गुन्हा दाखल केला आहे.
