खेड:- खेड येथील पोलिसांच्या तत्परतेमुळे कनिष्ठ महाविद्यालयातून पळून गेलेल्या दोघी अल्पवयीन मुलींचा शोध लागला. खेड शहरातील एका कनिष्ठ महाविद्यालयात शिकणाऱ्या दोन अल्पवयीन शाळकरी मुलींचे अपहरण झाल्याची तक्रार करण्यात आली होती.
अनुक्रमे १६ आणि १३ वयोगटातील या दोन शाळकरी मुली शाळा संपल्यानंतर घरी परतल्या नव्हत्या. या दोघींचा बाजारपेठेसह रेल्वेस्थानक, बसस्थानक, भरणे, खवटी व आजूबाजूच्या परिसरात शोध घेऊनही थांगपत्ता लागला नव्हता. अखेर एका मुलीच्या पालकाने अपहरण झाल्याची तक्रार पोलीस ठाण्यात नोंदवली होती.
पोलीस ठाण्यात याबाबतची तक्रार दाखल झाल्यानंतर पोलीस निरीक्षक नितीन भोयर यांनी लगेच तपास सुरू केला. शोधमोहिमेनंतर मडगाव येथून दोन्ही अल्पवयीन शाळकरी मुलींना ताब्यात घेण्यात यश आले. त्या दोन्ही मुली गोवा बघण्यासाठी रेल्वेने मडगावला गेल्या होत्या. पोलिसांच्या सतर्कतेने या दोन्ही मुलींना तेथून ताब्यात घेण्यात आले. त्यांचे समुपदेशन करून पालकांच्या स्वाधीन करण्यात आले.
