दापोली:- शहरातील फॅमिली माळ येथे उमेश कुदाळकर व इतर सहहिस्सेदार यांचे नावे असलेल्या मिळकतीमध्ये दिलेल्या परवानगीपेक्षा जादा माती उत्खनन केल्याप्रकरणी तहसिलदारांनी संबधितांना दंड ठोठावला आहे.
याबाबत तहसिलदार कार्यालयाकडून मिळालेल्या माहितीनुसार कुदाळकर व अन्य सहहिस्सेदारांना शंभर ब्रास माती उत्खनन करण्यासाठी महसूल विभागाकडून परवानगी देण्यात आली होती. मात्र मंडल अधिकाऱ्यानी जागेवर जाऊन पाहणी केली असता त्यांना 302 ब्रास माती उत्खनन केल्याचे निदर्शनात आले. यामुळे 302 ब्रास मातीचे उत्खननापोटी होणारी स्वामीत्वधनाची व इतर शुल्काची रक्कम 30 दिवसांच्या आत शासन दरबारी जमा करावी असे आदेश तहसीलदारांनी दिले आहेत. अन्यथा महाराष्ट्र जमीन महसूल अधिनियम 1966 चे कलम 487 दंडात्मक कारवाई करण्यात येईल अशी नोटीसही कुदाळकर व अन्य सहहिस्सेदारांना बजावली आहे.
