रत्नागिरी:- रत्नागिरी – कोल्हापूर महामार्गावर नाणीज येथील इरमलवाडी येथे साखरपाहून रत्नागिरीकडे येणारी कार समोरुन येणाऱ्या मालवाहू ट्रकवर आदळली. या भीषण अपघातात कार रस्त्याच्या कडेला फेकली गेली. या अपघातात पाच जण जखमी तर नातीच्या लग्नाला येणाऱ्या वृद्धेचा जागीच मृत्यू झाला.
या अपघातात सुवर्णा शिवराम नागवेकर (रा. वाडावेसवरांड, फनसवणे-भंडारवाडी, संगमेश्वर) यांचा मृत्यू झाला आहे. या अपघातात हरिश्चंद्र वारंग ६५, हर्षदा हरिश्चंद्र वारंग ६०,विक्रांत हरिश्चंद्र वारंग ३०, सुनील पेडणेकर ५५,सुषमा सुनील पेडणेकर ५० (सर्व रा. खारघर, मुंबई ) हे जखमी झाले आहेत. अपघाताची घटना शुक्रवारी (ता. २) दुपारी एक वाजता नाणीज-इरमलवाडी येथे घडली.
पोलिसांनी दिलेल्या माहितीनुसार ट्रक चालक मंजुनाथ शिद्राय पाटील (वय ३८) हे ट्रक (क्र. एमएच- ०९ सीए ३१२४) घेऊन जयगडहून सोलापूरला चालले होते. नाणीज येथील इरमलवाडी वाडी येथील वळणावर या समोरून येणाऱ्या कार (एमएच -०१डीपी २६५८) ट्रकला जोरदार धडक दिली. या अपघातात कार रस्त्याच्या कडेला खाली फेकली गेली. कार विक्रांत वारंग चालवत होते. या कारमध्ये सहा जण प्रवास करत होते. सर्व जण साखरप्यावरून रत्नागिरीकडे लग्नासाठी चाललेले होते.
