देवरूख:- मुंबई- गोवा महामार्गावरील आंबेड बुद्रुक येथे दोन मोटारसायकलची समोरासमोर धडक झाली. या भीषण अपघातात एकजण जागीच ठार तर दोन जण जखमी झाले आहेत. रविवार २८ नोव्हेंबर रोजी सायंकाळी ७.३० वाजता हा अपघात घडला.
संगमेश्वर पोलीसांनी दिलेल्या माहितीनुसार, या अपघातात विश्रुत सत्यन नायर (वय-२९) हा जागीच ठार झाला आहे. तर ॲक्सिस मोटरसायकलवरील दोघेजण गंभीर जखमी झाले आहेत. त्यांना अधिक उपचारासाठी रत्नागिरी येथे दाखल करण्यात आले आहे. या अपघातातील मृत झालेला विश्रुत नायर हा मुळचा केरळमधील असून तो बँक आँफ इंडीया संगमेश्वर शाखा बँकेतील कर्मचारी आहे.विश्रुत हा आपल्या ताब्यात बुलेट घेऊन रत्नागिरीहून संगमेश्वरला येत होता. तर अँक्सीस मोटारसायकलवरून दोघेजण आंबेडमधून रत्नागिरीच्या दिशेने जात होते. या दोन मोटारसायकलची आंबेडबुद्रुक येथे समोरासमोर धडक बसून भीषण अपघात घडला.
या अपघाताची माहिती मिळताच संगमेश्वर पोलीस ठाण्याचे निरीक्षक उदय झावरे, सहाय्यक पोलीस उपनिरीक्षक प्रशांत शिंदे, पोलीस हवालदार संतोष झापडेकर व पोलीस शिपाई सोमनाथ आव्हाड यांनी घटनास्थळी जावून पंचनामा केला. विश्रुत नायर याचा मृतदेह शवविच्छेदनासाठी संगमेश्वर ग्रामीण रूग्णालयात नेण्यात आला. अन्य दोन जखमींना रत्नागिरी येथे दाखल करण्यात आले आहे. याबाबतचा अधिक तपास संगमेश्वर पोलीस करीत आहेत.
