रत्नागिरी:- कोरोनाच्या काळात लहान मुलांसाठी देवदूत ठरलेले डॉ. दिलीप मोरे यांचे गुरुवारी पहाटे जिल्हा रुग्णालयात निधन झाले. अनेक लहान मुलांना कोरोनामुक्त करता करता त्यांनाच कोरोनाची लागण झाली होती. जिल्हा रुग्णालयात उपचार सुरू असताना गुरुवारी अखेर त्यांची प्राणज्योत मालवली.
रत्नागिरीतील सुप्रसिद्ध बालरोगतज्ज्ञ अशी त्यांची ख्याती होती. जवळपास 40 वर्षांपेक्षा अधिक काळ त्यांनी प्रॅक्टिस केली. सेवानिवृत्त झाल्यानंतर देखील त्यांनी जिल्हा रुग्णालयात सेवा देण्याचे काम सुरू ठेवले होते. कोरोनाच्या काळात जिल्हा रुग्णालयात दाखल होणाऱ्या लहान मुलांसाठी डॉ. मोरे देवदूत ठरले होते. 42 पेक्षा अधिक लहान मुलांना त्यांनी कोरोनाच्या विळख्यातून बाहेर काढले.
याच दरम्यान त्यांना देखील कोरोनाची लागण झाली. उपचारासाठी त्यांना जिल्हा रुग्णालयात दाखल करण्यात आले होते. मागील काही दिवस त्यांच्यावर जिल्हा रुग्णालयात उपचार सुरू होते. मात्र गुरुवारी पहाटे त्यांचे निधन झाले. त्यांच्या मृत्यूची बातमी कळताच संपूर्ण रत्नागिरीत हळहळ व्यक्त करण्यात येत होती.
