रत्नागिरी:- दुचाकी विक्रीची बतावणी करत 52 हजार 640 रुपयांची ऑनलाईन फसवणूक केल्याप्रकरणी दोन संशयितांविरोधात शहर पोलिस ठाण्यात गुन्हा दाखल करण्यात आला आहे. फसवणूकीची ही घटना गुरुवार 13 एप्रिल रोजी सायंकाळी 5.30 ते रविवार 23 एप्रिल 2023 रोजी दुपारी 12.51 वा.कालावधीत घडली आहे.
आकाश अनंत कुलकर्णी आणि नितिष कुमार अशी गुन्हा दाखल करण्यात आलेल्या दोन संशयितांची नावे आहेत.त्यांच्याविरोधात फिर्यादीने मंगळवार 25 एप्रिल रोजी शहर पोलिस ठाण्यात तक्रार दिली आहे.त्यानूसार,फिर्यादी यांनी फेसबुकवर सफेद रंगाची अ‍ॅक्टिव्हा दुचाकी विक्रिची जाहिरात पाहिली होती.जाहिरातीखाली दिलेल्या मोबाईल नंबरवर त्यांनी फोन केला असता आकाश कुलकर्णी याने आपण सोलापूर येथून बोलत असल्याचे सांगून दुचाकीची माहिती देत ती विकायची असल्याचे त्यांना सांगितले.
त्यानंतर आकाशने दुचाकीची डिलिव्हरी देणार्‍या नितीष कुमारच्या गुगलपेचा क्युआर कोड फिर्यादी यांना पाठवून त्यावर दुचाकीची रक्कम पाठवण्यास सांगितले.त्याच्या बोलण्यावर विश्वास ठेवत फिर्यादी यांनी आपल्या पत्नीच्या बँक खात्यातून ऑनलाईन पध्दतीने संशयितांना 52 हजार 640 रुपये पाठवले. परंतू त्यानंतरही फिर्यादींना दुचाकी न मिळाल्याने आपली फसवणूक झाल्याचे त्यांच्या लक्षात येताच त्यांनी शहर पोलिस ठाण्यात तक्रार दिली.याप्रकरणी अधिक तपास शहर पोलिस करत आहेत.
