उत्तर रत्नागिरीतील ॲम्ब्युलन्स चालकांनी घेतला संपाचा पवित्रा
रत्नागिरी:- शनिवार दिनांक 12 डिसेंबर 2020 रोजी रात्री साडेनऊच्या दरम्यान चिपळूण तालुक्यातील मार्गताम्हाणे येथे अपघातग्रस्त युवकाला घेण्यासाठी गेलेल्या 108 ॲम्ब्युलन्स ड्रायव्हरला दोघांनी मारहाण केली. पंचनामा होण्यापूर्वी अपघातग्रस्ताला नेऊ नये असे सांगत दोघांनी गमरे यास जबर मारहाण केली. तरीही ॲम्ब्युलन्स ड्रायव्हर गमरे याने संबंधित अपघातग्रस्ताला कामथे येथील रुग्णालयात दाखल केले.
या मारहाण विरोधात चिपळूण, मंडणगड, दापोली, गुहागर आणि खेड येथील 108 ॲम्ब्युलन्स ड्रायव्हर एकत्र आले असून त्यांनी मारहाण करणाऱ्यांविरोधात पोलीस ठाण्यात तक्रार दाखल केली आहे. मारहाण करणारे मार्गताम्हाणे येथील सुधीर (गोट्या) चव्हाण, सतीश (बाबल्या) चव्हाण यांच्यावर कारवाई न झाल्यास 108 ॲम्ब्युलन्स ड्रायव्हर बंद पुकारणार आहेत.
कोविड काळामध्ये ॲम्ब्युलन्स ड्रायव्हर यांना कोरोना योद्ध्यांची उपमा देण्यात आली मात्र आता रुग्ण सेवा देत असताना आम्हाला मारहाण होत असेल तर आम्ही सहन करणार नाही असे मत चिपळूण, खेड आणि गुहागरच्या 108 ॲम्ब्युलन्स ड्रायव्हरनी व्यक्त केले आहे.
