रत्नागिरी:- न्यूमोकोकस या जीवाणूमुळे होणार्‍या न्युमोनिया आणि मेनिजायटिसपासून बालकाचे रक्षण करण्यासाठी न्यूमोकोकल कॉन्जुगेट व्हॅक्सियन लस जिल्ह्यातील बालकांना देण्यात येणार आहे. त्यासाठी 1100 मात्रा जिल्ह्याला प्राप्त झाल्या आहेत.
मुख्य कार्यकारी अधिकारी डॉ. इंदुराणी जाखड यांच्या दालनात न्यूमोकोकल कॉन्जुगेट व्हॅक्सिमन (झउत) लसीकरण कार्यक्रमासंदर्भात बैठक झाली. यावेळी महिला व बाल कल्याण अधिकारी योगेश जवादे, डॉ. दिलिप माने, डॉ. चौधरी, डॉ. देशमुख, डॉ. चंद्रकांत शेरखाने, डॉ. दिनेश सुतार, डॉ. सतिश गुजलवार आदी उपस्थित होते.
न्यूमोकोकल कॉन्जुगेट व्हॅक्सिनचा नियमित लसीकरणात समावेश करण्यात आलेला आहे. ही लस न्यूमोकोकस या जीवाणूमुळे होणार्‍या न्युमोनिया आणि मेनिजायटिसपासून बालकाचे रक्षण करते. न्यूमोकोकल कॉन्जुगेट व्हॅक्सियन लस ही अतिशय सुरक्षित लस असून दीड महिना (6 आठवडे), साडेतीन महिने (14 आठवडे) व 9 महिन्यांपर्यंतच्या बालकांना देण्यात येणार आहे. इतर कोणत्याही लसीप्रमाणे ही लस दिल्यावर बालकाला सौम्य ताप येऊ शकतो किंवा इंजेक्शन टोचलेली जागा लालसर होऊ शकते. जेव्हा बालकाला पीसीव्ही लस देण्यात येईल, त्याचवेळी वेळापत्रकानुसार लागू असलेल्या अन्य लसी देखील देण्यात येतील. रत्नागिरी जिल्ह्यात पीसीव्ही लसीचे 1 हजार 100 डोस प्राप्त झाले आहेत. त्याचे वाटप प्राथमिक आरोग्य केंद्रस्तरावर करण्यात आल्याचे जिल्हा आरोग्य अधिकारी डॉ. अनिरुध्द आठल्ये यांनी सांगितले. तसेच डॉ. इंदुराणी जाखड यांनी न्यूमोकोकल कॉन्जुगेट व्हॅक्सिन नियमीत लसीकरणात समावेश करण्यात येत असल्याचे सांगितले. पीसीव्ही ही देण्यात येणारी लस विनामुल्य असल्याचे सांगून नागरिकांनी आपल्या बालकांना देण्याचे आवाहन त्यांनी केले.
