रत्नागिरी:- मी बँकेचा मॅनेजर बोलतोय, तुमचे एटीएम कार्ड बंद पडले आहे. अशी बतावणी करत अज्ञाताने खेडशी येथील महिलेकडून बँक खात्याची माहिती घेत खात्यातील दीड लाख रुपये काढून घेतल्याची घटना बुधवारी 26 नोव्हेंबर रोजी घडली. या प्रकरणी ग्रामीण पोलीस स्थानकात गुन्हा दाखल करण्यात आला आहे.
फसवणूक झाल्या प्रकरणी विनोदिनी विनोद कडवईकर (49, रा. एकता नगर खेडशी) यांनी ग्रामीण पोलीस स्थानकात फिर्याद दाखल केली आहे. कडवईकर यांना 25 नोव्हेंबर रोजी दुपारी मोबाईलवर फोन आला. मी बँक ऑफ महाराष्ट्र खेडशी नाका येथील बॅक मॅनेजर गुप्ता बोलतोय तुमचे आमचे बॅकेचे एटीएम कार्ड बंद पडलेले आहे. त्याची केवायसी करायची आहे. त्यासाठी आपला अकाऊंट नंबर व आपल्या मोबाईलवर ओटीपी येईल तो सांगा असे सांगितले. त्याचप्रमाणे फिर्यादी यांनी आपले बॅक खात्याची माहीती सदर इसमास लागलीच मोबाइलद्वारे दिली असता त्याने फिर्यादीच्या खात्यातील 1 लाख 50 हजार 18 रुपये इतकी रक्कम पाच वेळा काढली. या प्रकरणी अज्ञात आरोपी विरोधात गुन्हा दाखल करण्यात आला आहे.
