खासगीकरणातून निधी उभारण्याचा प्रस्ताव
रत्नागिरी:- नॅशनल मनीटायझेशन पाइपलाइन योजनेंतर्गत रेल्वे मार्गासह स्थानके आणि पॅसेंजर गाड्या भाड्याने देऊन त्यामधून निधी उभारण्याचा निर्णय घेतला आहे. त्यात कोकण रेल्वेच्या 741 किलोमीटर मार्गाचा समावेश आहे. त्यामुळे कोकण रेल्वेच्या खासगीकरणाच्या दिशेने वाटचाल असल्याचा अंदाज वर्तविला जात आहे.
नॅशनल मनीटायझेशन पाइपलाइन योजनेची केंद्रीय वित्त मंत्री निर्मला सीतारामन यांनी घोषणा केली . त्यात देशातील रस्ते, रेल्वे, शिपिंग, बंदरे या सार्वजनिक मालमत्ताच्या निर्गुतवणुकीचा प्रस्ताव तयार करण्यात आला आहे. केंद्र सरकारने 400 रेल्वे स्टेशन, 90 पॅसेंजर गाड्या आणि 1400 किमी ट्रॅक भाड्याने देऊन 1.52 लाख कोटी उभारण्याच्या हालचाली सुरु केल्या आहेत. त्यात कोकण रेल्वेच्या 741 किलोमीटर मार्गाचा समावेश केला आहे. खाजगीकरणामुळे कोकण रेल्वेकडून 7 हजार 281 कोटी रुपये आणि डोंगरावर चालणार्‍या रेल्वेकडून 630 कोटी रुपये मिळतील असा अंदाज आहे. कोकण रेल्वे मार्गावर छोटी-मोठी 69 रेल्वे स्थानके आहेत. खासगीकरण केल्यास स्थानकांची मालकी केंद्राकडे राहणार असून ती ठेकेदाराला चालवण्यास दिली जाऊ शकतात. यामध्ये स्थानकांचे व्यवस्थापन आणि तिकिटे ठरवण्याचा अधिकार ठेकेदाराकडे राहू शकतो. केंद्रीय मंत्र्यांनी जाहीर केलेल्या योजनेत कोकण रेल्वे मार्गाचा समावेश केला असला तरीही कोणती स्थानके घेणार याचा उल्लेख नाही. त्यामुळे खासगीकरणाचे हे धोरण आहे काय याबाबत शंका व्यक्त केली जात आहे.
