राजापूरातील करक येथील घटना; वनविभागाकडून बिबट्याची सुटका
पाचल:- तालुक्यातील करक तांबळवाडी येथील आत्माराम गंगाराम कांबळे यांच्या लोखंडी तारेच्या कोंबड्यांच्या खुराड्यामध्ये अडकलेल्या बिबट्याला सुखरूप पिंजऱ्यात जेरबंद करत वनविभागाने जीवदान दिले आहे.
राजापूर तालुक्यातील मौजे करक तांबळवाडी येथील श्री. आत्माराम गंगाराम कांबळे यांच्या नवीन बांधकाम चालू असलेल्या घराजवळ लोखंडी तारेच्या कोंबड्यांच्या खुराड्यामध्ये बिबट्या अडकला असल्याची माहिती पोलीस पाटील करक यांनी वनपाल राजापूर यांना भ्रमणध्वनीवरून दिली. ही घटना आज सोमवारी घडली.
बिबटया अडकल्याची माहिती परिक्षेत्र वन अधिकारी रत्नागिरी यांना कळवून, त्यांचे समवेत वनपाल राजापूर, वनरक्षक राजापूर व रेस्क्यू टीमसह घटनास्थळी जाऊन पाहणी केली. परिस्थिती लक्षात घेऊन प्रथमदर्शी बिबट्या अडकलेल्या लोखंडी तारेच्या खुरड्याला ग्रिन शेड नेट गुंडाळून घेऊन पिंजरा लावण्यात आला. बिबट्या अडकला असलेल्या खुराड्याच्या लोखंडी तारा कापून त्याला पिंजऱ्यात सुरक्षित घेऊन पशुधन विकास अधिकारी राजापूर यांचेकडून तपासणी केली असता, सदरचा बिबट्या हा मादी जातीचा असून त्याचे वय एक ते दीड वर्ष असल्याची व तो सुस्थितीत असलेची माहिती पशुधन विकास अधिकारी राजापूर यांनी दिली.
ही कार्यवाही मा. विभागीय वन अधिकारी रत्नागिरी (चिपळूण) श्रीम. गिरिजा देसाई मॅडम व सहाय्यक वनसंरक्षक चिपळूण श्रीम. प्रियांक लगड मॅडम, वनक्षेत्रपाल रत्नागिरी श्री. प्रकाश सुतार यांच्या मार्गदर्शनाखाली करण्यात आली. हा बिबट्या सुस्थितीत असल्याने नैसर्गिक अधिवासात मुक्त करण्यात आले. सदर कामगिरीसाठी रत्नागिरी, वनक्षेत्रपाल श्री. प्रकाश सुतार, वनपाल राजापूर श्री. जयराम बावदाणे, वनरक्षक राजापूर श्री. विक्रम कुंभार, वनरक्षक श्री. जालने व रेस्क्यू टीमचे श्री. दीपक चव्हाण, श्री. दीपक म्हादये, श्री. नितेश गुरव, श्री. अमित बाणे, श्री. निलेश म्हादये उपस्थित होते.
अशा प्रकारच्या घटना घडल्यास किंवा वन्यप्राणी अडचणीत सापडल्यास वन विभागाचा टोल फ्री क्रमांक १९२६ किंवा ९४२१७४१३३५ या क्रमांकावर संपर्क साधण्याचे आवाहन वन विभागाच्या वतीने श्रीमती गिरीजा देसाई विभागीय वनाधिकारी रत्नागिरी यांनी केली आहे.
