रत्नागिरी:- रत्नागिरी-सिंधुदुर्ग लोकसभा मतदारसंघातून महायुतीमार्फत केंद्रीय मंत्री ना.नारायणराव राणे यांना उमेदवारी जाहीर झाल्यानंतर आता महायुतीची धूसफुस बाहेर पडू लागली आहे. किरण सामंत यांना उमेदवारी नाकारण्यात आल्यानंतर आता शिवसेना पदाधिकाऱ्यांनी राजीनामास्र सुरू केले आहे. शिवसेना जिल्हाप्रमुख मुन्ना देसाई यांनी आपल्या पदाचा राजीनामा देत असल्याचे व्हॉटस्‌‍ॲप स्टेटसद्वारे जाहीर केले आहे.
रत्नागिरी-सिंधुदुर्ग लोकसभा मतदारसंघातून उमेदवारी मिळण्यासाठी महायुतीतील भाजप, शिवसेना दोन्ही पक्ष आग्रही होते. या लोकसभा मतदारसंघात शिवसेनेचे खासदार असल्याने ही जागा आम्हालाच मिळावी असा दावा मंत्री उदय सामंत यांनी केला होता. तर या जागेसाठी किरण उर्फ भैय्या सामंत इच्छुक होते. गेले महिनाभर ते सातत्याने आपल्याला उमेदवारी मिळण्यासाठी प्रयत्न करत होते. परंतु अखेरच्या क्षणी भाजपने नारायणराव राणे यांना उमेदवारी जाहीर केल्यानंतर शिवसैनिक नाराज झाले आहेत.
किरण सामंत यांना उमेदवारी न मिळाल्यामुळे वैयक्तिक कारण देत युवा सेना जिल्हाप्रमुख मुन्ना देसाई यांनी आपल्या पदाचा राजीनामा देत असल्याचे व्हॉटस्‌‍ॲप स्टेटसद्वारे जाहीर केले आहे. त्यामुळे ऐन निवडणुकीत अन्य शिवसेना पदाधिकारी कोणता निर्णय घेतात याकडे सर्वांचे लक्ष लागले आहे.
मुन्ना देसाईनंतर उपतालुका युवा अधिकारी संदीप नाखरेकर यांनीही आपल्या पदाचा राजीनामा दिला असून प्रकृती अस्वस्थता व आर्थिक कारणामुळे राजीनामा देत असल्याचे म्हटले आहे. त्यामुळे युवा सेनेनंतर आता बेसिक शिवसेनेतही राजिनामा सत्र सुरू होण्याची शक्यता आहे.
