चिपळूण:- चिपळूण – विजापूर मार्गावरील कुंभार्ली घाटात मंगळवारी सकाळी कारचा अपघात झाला. या अपघातात सांगलीतील सुरेश लक्ष्मण कांबळे (वय ७०) या वृद्धाचा मृत्यू झाला.
मिळालेल्या माहितीनुसार, कार चालक बाबासाहेब बाळू सुवासे (रा. सध्या दापोली, मूळ कोल्हापूर) हे दापोली येथे समाजकल्याणच्या वसतीगृहात अधीक्षक म्हणून काम करतात. मंगळवारी सकाळी ते आपल्या कारने कोल्हापूरकडे निघाले होते. बहादूरशेख- चिपळूण येथे आले असता त्यांना काही प्रवाशांनी हात दाखविला असता त्यांनी गाडी उभी केली. यावेळी तिघा प्रवाशांनी इस्लामपूरला सोडा अशी विनंती केली. या विनंतीनंतर एक पतीपत्नी व वृद्ध सुरेश लक्ष्मण कांबळे (७०, रा. शिराळा, सांगली) यांना सुवासे यांनी कारमध्ये घेतले.
कुंभार्ली घाटात महामार्गावर पावसामुळे धुक्याचे वातावरण होते. कार घाट चढत असताना अचानक एक गाय कारच्या समोर आल्याने चालक सुवासे यांनी कार उजव्या बाजूला घेतली असता कार उलटली व रस्त्याच्या खाली जाऊन चरात अडकली. या अपघातात वृद्ध सुरेश लक्ष्मण कांबळे यांचा मृत्यू झाला तर अन्य तिघे वाचले. अपघात झाल्यानंतर चालक सुवासे व पतीपत्नीला सुखरूप बाहेर काढण्यात आले. चालक सुवासे हे मयत सुरेश कांबळे यांना बाहेर काढत असताना प्रवासी पतीपत्नी तेथून निघून गेले परंतु त्यांचा मोबाईल कारमध्येच पडल्याचे समजते. अपघातात कारचे सुमारे अडीच ते तीन लाखाचे नुकसान झाले आहे. या अपघाता नंतर चिपळूण पोलिस ठाण्यात कार चालक बाबासाहेब सुवासे यांनी फिर्याद दिली. हा अपघात अलोरे-शिरगाव पोलिस ठाण्याच्या हद्दीत झाला.
