रत्नागिरी:- सध्या वाहनांना एचएसआरपी नंबर प्लेट बसवण्यासाठी रत्नागिरीकर वाहनचालकांची मोठी धावपळ उडालेली आहे. शहरानजीकच्या एमआयडीसी मिरजोळे येथे रियल मेझॉन एम्बॉसिंग सेंटर येथे त्यासाठी नेमलेल्या एजन्सीकडे कमी कर्मचारी संख्येमुळे नागरिकांना ताटकळत राहावे लागत आहे. तसेच पिण्याच्या पाण्याची आणि आसन व्यवस्था नसल्याने गैरसोय होत आहे. याबाबत काही नागरिकांनी पालकमंत्री उदय सामंत आणि आमदार किरण सामंत यांच्याकडे तक्रार केली होती. सामंत बंधूंच्या सुचनेनुसार माजी नगरसेवक निमेश नायर व राहील मुजावर यांनी धडक देत तेथील गैरसोय दूर करण्याया सक्त सुचना केल्या.
सरकारने सर्व प्रकारच्या वाहनांना एचएसआरपी प्रकारची नंबरप्लेट बसविणे सक्तीचे केले आहे. ही नंबरप्लेट बसविण्याची अंतिम मुदत मार्च महिन्याअखेर संपणार आहे. त्यामुळे रत्नागिरीमधील नागरिकांची ही नंबर प्लेट बसविण्यासाठी धावपळ सुरू आहे. लाखोंची लोकसंख्या असलेल्या रत्नागिरीसाठी शासनाने एचएसआरपी नंबर प्लेट बसविण्यासाठी रियल मेझॉन एम्बॉसिंग सेंटर नावाची केवळ एक एजन्सी नेमली आहे. ती एजन्सी देखील कोल्हापूर येथील आहे. त्यांचे ऑफिस शहराबाहेर मिरजोळे एमआयडीसी येथे आहे. त्यामुळे शहरातील नागरिकांना एचएसआरपी नंबर प्लेट बसविण्यासाठी मोठा हेलपाटा पडत आहे.
तरी देखील नागरिक सरकारी नियम पाळण्यासाठी एचएसआरपी नंबर प्लेट वाहनांना बसविण्यासाठी आगाऊ वेळ घेऊन या एजन्सीमध्ये जात आहेत. परंतु या एजन्सीमध्ये कर्मचार्‍यांची संख्या कमी आहे. त्यामुळे आगाऊ वेळ घेऊन आलेल्या नागरिकांना त्याठिकाणी ताटकळत राहावे लागत आहे. येणाऱ्या वाहनचालकांसाठी या एजन्सीने ना पिण्याच्या पाण्याची सोय केली आहे ना बसण्याची. या गैरसोयीबद्दल रत्नागिरीतील नागरिकांनी पालकमंत्री उदय सामंत व आमदार किरण सामंत यांच्याकडे फोनवरून तक्रारी केल्या. या तक्रारींची दखल घेत उदय सामंत आणि आमदार किरण सामंत यांनी तात्काळ माजी नगरसेवक निमेश नायर व राहील मुजावर यांना त्याठिकाणी पाठवले.
माजी नगरसेवक निमेश नायर यांनी शिवसेना स्टाईलने ही एजन्सी चालविणारे पटेल यांना दणका दिला. निमेश नायर यांच्या दणक्यानंतर पटेल यांनी आपली चूक मान्य करत येत्या दोन दिवसांत 10 कर्मचारी रुजू करण्याचे आश्वासन देत नागरिकांना पिण्याचे पाणी, आसन व्यवस्था आदी गैरसोयी दूर करण्याचे आश्वासन दिले. निमेश नायर यांच्या दणक्यानंतर नागरिकांची मोठी गैरसोय दूर झाल्यामुळे उपस्थित नागरिकांकडून उदय सामंत, आमदार किरण सामंत तसेच निमेश नायर, राहील मुजावर यांयाविषयी समाधान व्यक्त होत आहे.
