सोलापूर जिल्ह्यातील बार्शी येथील घटना
रत्नागिरी:- सोलापूरमधील बार्शी शहरात पैशाच्या वादातून रागाच्या भरात आईच्या डोक्यात दगड घालून तिची निघृण हत्या करणाऱ्या दिवट्याला रत्नागिरी शहर पोलिसांनी भाट्ये येथे गुरुवारी अटक करून सोलापूर पोलिसांच्या ताब्यात दिले आहे. गुन्हे प्रगटीकरण शाखेचे सहाय्य्क पोलीस निरीक्षक मनोज भोसले यांच्या पथकाने हि कारवाई केली.
बार्शी शहरातील सुभाषनगर भागातील वाणी प्लॉट येथे राहत्या घरामध्ये मुलानेच आईच्या डोक्यामध्ये दगड घालून खून करून पुरावा नष्ट करण्यासाठी मृतदेह घराबाहेर फरफटत आणून प्लास्टिकमध्ये गुंडाळून झुडपामध्ये टाकून दिल्याची घटना तब्बल तीन दिवसांनी उघडकीस आली होती. बार्शी शहर पोलिस ठाण्यात मुलाविरोधात खुनाचा गुन्हा दाखल झाला आहे. श्रीराम नागनाथ फावडे (वय २१) असे गुन्हा दाखल झालेल्या संशयित तरुणाचे नाव आहे. पोलिस हवालदार अरुण माळी यांनी फिर्याद दाखल केली. रुक्मिणी नागनाथ फावडे (वय ४५) असे खून झालेल्या महिलेचे नाव आहे. ही घटना मंगळवारी सकाळी साडेआठच्या दरम्यान उघडकीस आली होती.
रुक्मिणी यांच्या घराचा दरवाजा अर्धवट उघडा होता, घरातील गादीवर रक्त सांडलेले होते, दगडांचे लहान तुकडे गादीवर, बाजूला पडलेले दिसले तसेच मृत महिला रुक्मिणी फावडे यांना कोणीतरी बाहेर कंपाऊंडपर्यंत ओढत नेल्याच्या खुणा दिसत होत्या. रुक्मिणी यांच्या डोक्यात मोठा दगड मारल्याने कवटी फुटून रक्तस्त्राव होऊन त्यांचा मृत्यू झाला असल्याचे प्राथमिक अहवालात निष्पन्न झाल्याचे वैद्यकीय अधिकाऱ्यांनी सांगितले होते. वाणी प्लॉट येथे रुक्मिणी व त्यांचा मोठा मुलगा श्रीराम फावडे एकत्र राहत होते. लहान मुलगा व पती यांचे भांडण् होत असल्याने ते डमरे गल्ली येथे वेगळे राहत होते. श्रीराम व रुक्मिणी यांच्यात पैशावरुन नेहमी वाद होत.
याबाबत बार्शी शहर पोलिसात तक्रारी दाखल आहे.
रुक्मिणी फावडे यांच्या जमीन विक्री करून पाच लाख रुपये आले होते. मुलगा श्रीराम तिच्याकडे वारंवार पैशाची मागणी करत होता. चार महिन्यापूर्वी रुक्मिणी यांना मारहाण केल्याप्रकरणी शहर पोलिसांत मुलाविरुद्ध तक्रार दाखल करण्यात आली होती मात्र मंगळवारी त्याची हत्या करून श्रीराम फावडे रत्नागिरीत पळून आला होता. बार्शी पोलिसांनी याची माहिती दिल्यानंतर गुन्हे प्रगटीकरण शाखेचे सहाय्य्क पोलीस निरीक्षक मनोज भोसले यांच्या पथकाने त्याला भाट्ये येथून ताब्यात घेतले.
