रत्नागिरी:- शहराजवळील चंपक मैदानात अल्पवयीन मुलीवर लैंगिक अत्याचार करणाऱ्या तीन संशयितांचा जमीन अर्ज न्यायालयाने नाकारला. अत्याचाराची घटना ९ मार्च २०२२ रोजी रात्री ११.३० वा. सुमारास घडली होती.
तन्वीर वस्ता (२२, रा . राजिवडा), अनिकेत प्रकाश नाखरेकर (२४) आणि ऋषिकेश मधूकर टिकेकर (२२, दोन्ही रा. निवखोल, रत्नागिरी) अशी जामीन अर्ज नाकारलेल्या तीन संशयितांची नावे आहेत. ग्रामीण तसेच शहरी भागात शिमगोत्सव सुरु असताना अल्पवयीन पीडित मुलगी होळी पाहण्यासाठी घराबाहेर पडली होती. याचा गैरफायदा घेत यातील एका संशयिताने तिला दुचाकीवरुन शहरालगतच्या जंगलमय मैदानात नेले. त्यावेळी त्याचे दोन मित्रही तिथे आले होते. त्यानंतर तिघांनीही तिच्यावर लैंगिक अत्याचार केला. दरम्यान ही बाब स्थानिकांच्या निदर्शनास येताच त्यांनी शहर पोलिसांना याची खबर दिली होती. पोलिसांनी तातडीने कारवाई करत तिघांनाही अटक करुन तिघांवरही लैंगिक अत्याचारापासून मुलांचे संरक्षण कायदा २०१२ ( पोक्सो ) अंतर्गत गुन्हा दाखल केला होता. न्यायालयाने त्यांना प्रथम पोलिस कोठडी सुनावून नंतर त्यांची रवानगी न्यायालयीन कोठडीत करण्यात आली होती. दरम्यान, या तिघांनीही न्यायालयात जमिनासाठी अर्ज केला होता. परंतु, १ जून रोजी न्यायालयाने तिघांचेही जामीन अर्ज नाकारले.
